Կոնգրեսական Գաս Բիլիրակիսը հաստատակամ է նպաստել Հայաստանի և Արցախի հետ ԱՄՆ-ի կապերն ամրապնդելու գործին
2 րոպեի ընթերցում
![Կոնգրեսական Գաս Բիլիրակիսը հաստատակամ է նպաստել Հայաստանի և Արցախի հետ ԱՄՆ-ի կապերն ամրապնդելու գործին](http://armenpress.am/resized/480/static/news/b/2014/01/746268.jpg)
ԵՐԵՎԱՆ, 15 ՀՈՒՆՎԱՐԻ, ԱՐՄԵՆՊՐԵՍ: ԱՄՆ կոնգրեսական Գաս Բիլիրակիսը հայկական համայնքին վստահեցրել է, որ շարունակելու է հանդես գալ ԱՄՆ- Հայաստան, ԱՄՆ- Լեռնային Ղարաբաղ հարաբերությունների ամրապնդման, երեք երկրների միջև տնտեսական և ռազմավարական համագործակցության մակարդակի բարձրացման օգտին:
«Դուք կարող եք համոզված լինել, որ ես շարունակելու եմ աշխատանքները Կոնգրեսի իմ գործընկերների հետ` օգնելով ձևավորելու ԱՄՆ քաղաքականությունը Հայաստանում և Լեռնային Ղարաբաղում: Ավելին, ես իմ գործընկերներին կփոխանցեմ ձեր խանդավառությունը հայ-ամերիկայն հարաբերությունների ամրապնդման հարցում»,- ինչպես «Արմենպրես»-ը տեղեկացավ Հայ դատի ԱՄՆ հանձնախմբից, հայ համայնքին է դիմել հույն կոնգրեսականը, ով Կոնգրեսում որպես Հայաստանին սատարող խմբի անդամ է:
Բիլիրակիսը մշտապես իր աջակցությունն է ցուցաբերել Հայաստանին և Արցախին վերաբերող ամենատարբեր հարցերում: «Ես հպարտ եմ, որ աջակցել եմ Հայոց ցեղասպանության զոհերի հիշատակին նվիրված 227-րդ բանաձևին: Կոնգրեսում մի քանի նամակներ եմ ստորագրել` ուղղված նախկին և ներկայիս նախագահներին` նրանց հորդորելով ճանաչել Հայոց ցեղասպանությունը և հարգել զոհերի հիշատակը»,- նշել է Բիլիրակիսը:
Նա նաև օժանդակել է ԱՄՆ-ի կողմից Հայաստանի և Լեռնային Ղարաբաղի` հատկացվելիք ֆինանասական և ռազմական օգնության ընդգրկմանը Արտաքին գործառնությունների հատկացումների ամենամյա փաստաթղթում: