1 րոպեի ընթերցում
ԵՐԵՎԱՆ, 29 ՆՈՅԵՄԲԵՐ, ԱՐՄԵՆՊՐԵՍ: ՀՀ գլխավոր հարկադիր կատարող, արդարադատության գեներալ-մայոր Միհրան Պողոսյանը Փարիզում Դատական կատարողների միջազգային միության (ԴԿՄՄ) նիստի ժամանակ ներկայացրել է ծառայության գործունեության շարունակական կատարելագործման և այն ապահովող մեխանիզմների արդիականացման ներկայիս հիմնախնդիրները, տեղեկատվական տեխնոլոգիաների կիրառման արդյունքում արձանագրած հաջողություններն ու հասարակությանն իրազեկելու ուղղությամբ տարվող աշխատանքները:
Ինչպես տեղեկանում է «Արմենպրես»-ը ԴԱՀԿ մամուլի ծառայությունից, ելույթից հետո ԴԿՄՄ նախագահը հայտարարել է, որ Հայաստանի ԴԱՀԿ ծառայության կարգավիճակն ու արձանագրած հաջողությունները հիմք են տալիս համագործակցությունը շարունակել Միության անդամի կարգավիճակով: ԴԿՄՄ-ն առաջարկել է սկսել անդամակցության համար սահմանված գործընթաց, եւ այդ համատեքստում երկուստեք պայմանավորվածություն է ձեռք բերվել գործընթացը տրամաբանական ավարտին հասցնելու ընդհանուր ռազմավարություն համար քայլեր մշակելու վերաբերյալ: