Հայաստանն Ադրբեջանի ագրեսիային դիմակայելու հարցում ՀԱՊԿ կամ ՌԴ ներգրավման անհրաժեշտությունը չի տեսնում. ՀՀ ՊՆ մամուլի քարտուղար
3 րոպեի ընթերցում
![Հայաստանն Ադրբեջանի ագրեսիային դիմակայելու հարցում ՀԱՊԿ կամ ՌԴ ներգրավման անհրաժեշտությունը չի տեսնում. ՀՀ ՊՆ մամուլի քարտուղար](http://armenpress.am/resized/480/static/news/b/2013/11/738996.jpg)
ԵՐԵՎԱՆ, 5 ՆՈՅԵՄԲԵՐԻ, ԱՐՄԵՆՊՐԵՍ: ՀՀ ռազմաքաղաքական ղեկավարությունը բազմիցս նշել է , որ Ադրբեջանի ագրեսիային դիմակայելու հարցում Հավաքական անվտանգության պայմանագրի կազմակերպության կամ ՌԴ ներգրավման անհրաժեշտությունը չի տեսնում, և ՀՀ Զինված ուժերի կարողությունները ավելի քան բավարար են ցանկացած մարտական խնդիր կատարելու համար: ՀԱՊԿ անդամակցությունը և հայ-ռուսական ռազմական համագործակցությունն ուղղված է երրորդ երկրի հավանական ագրեսիայի կանխմանը: «Արմենպրես»-ի հաղորդմամբ` այս մասին «Ֆեյսբուքի» իր էջում նշել է ՀՀ պաշտպանության նախարարի մամուլի քարտուղար Արծրուն Հովհաննիսյանը` անդրադառնալով այն հանգամանքին, որ Ադրբեջանի պաշտպանության նորանշանակ նախարարը ԵԱՀԿ Մինսկի խմբի համանախագահների հետ հանդիպման ժամանակ պարզաբանումներ է պահանջել Գյումրիի 102-րդ ռազմակայանի հրամանատարի՝ «Կրասնայա Զվեզդա» թերթին տրված հարցազրույցի վերաբերյալ:
Հայաստանում տեղակայված ռուսական 102-րդ ռազմակայանի զորախմբի հրամանատար, գնդապետ Անդրեյ Ռուզինսկին «Կրասնայա զվեզդա» թերթում հրապարակված հարցազրույցում հայտարարել էր, որ Լեռնային Ղարաբաղի դեմ Ադրբեջանի հարձակման դեպքում ռուսական բազան կարող է ներգրավվել ռազմական գործողություններում: Անդրադառնալով ռազմակայանի պատասխանատվության գոտու ռազմաքաղաքական իրադրությանը` Ռուզինսկին նշել Էր, որ այն «մնում Է անհանգիստ եւ բնութագրվում Է մի շարք ապակայունացոնղ գործոններով՝ կապված հայ-ադրբեջանական հակամարտության տարածաշրջանում դիմակայության սրվելու հնարավորության հետ»: «Ադրբեջանի ղեկավարության կողմից Լեռնային Ղարաբաղի նկատմամբ իրավասությունն ուժային ճանապարհով վերականգնելու վերաբերյալ որոշման ընդունման դեպքում ռազմակայանը, Հավաքական անվտանգության պայմանագրի կազմակերպության շրջանակներում Ռուսաստանի Դաշնության պայմանագրային պարտավորություններին համապատասխան, կարող Է միջամտել ռազմական հակամարտությանը»,-ասել էր Ռուզինսկին:
Արծրուն Հովհաննիսյանը նաև նշել է, որ Ադրբեջանի պաշպանության նախարարին իր աշխատակազմը ըստ երևույթին պատշաճ կերպով չի տեղեկացրել Հավաքական անվտանգության պայմանագրի 4-րդ հոդվածի, ինչպես նաև 2010թ. օգոստոսին ՀՀ-ում ՌԴ ռազմական բազային մասին ստորագրված թիվ 5 արձանագրության վերաբերյալ: