Տարածաշրջանային

Անվանի 30 գործիչներ բաց նամակով քննադատել են Էրդողանին

2 րոպեի ընթերցում

Անվանի 30 գործիչներ բաց նամակով քննադատել են Էրդողանին

ԵՐԵՎԱՆ, 25 ՀՈՒԼԻՍԻ, ԱՐՄԵՆՊՐԵՍ: Բրիտանական հայտնի The Times պարբերականում անվանի շատ գործիչներ հանդես են եկել Թուրքիայի վարչապետ Ռեջեփ Թայիփ Էրդողանի վարած քաղաքականության քննադատությամբ: Ինչպես հաղորդում է «Արմենպրես»-ը, այս մասին տեղեկացնում է թուրքական CNN Turk-ը:

Շուրջ 30 գործչի ստորագրությունը կրող բաց նամակում գործիչները հիշեցրել են, որ Թուրքիան Եվրոպայի խորհրդի անդամ է և կողմ է արտահայտվել Եվրոպայի մարդու իրավունքների համաձայնագրին: Նրանք անընդունելի են համարել Թուրքիայի վարչապետի կողմից բողոքի ակցիայի մասնակիցներին «թալանչիներ», «խուլիգաններ» անվանելը: «Այս հայտարարությունը հրապարակեցինք, քանի որ քննադատում ենք 5 հազար մարդու մահվան, արցունքաբեր գազի հետևանքով 11 մարդու տեսողությունը վնասելու, 8 հազար մարդու վիրավորվելու պատճառ դարձած ուժի կիրառումը»,- նշվում է հայտարարության մեջ:

Թուրքիայում մայիսի 28-ից մեկնարկած հակակառավարական ցույցերը սկիզբ առան Գեզի զբոսայգուց, որտեղից ոստիկանությունը դաժան կերպով ցրեց այգու պաշտպաններին: Ծառերի մի մասը պետք է կտրվեին կառավարության որոշմամբ հրապարակի վերակառուցման շրջանակում: Բնապահպանական նկատառումներով Թուրքիայում սկսված բողոքի ակցիաները վերածվել են հակակառավարական ցույցերի, որոնց մասնակիցները դժգոհ են իշխանությունների վարած ներքին եւ արտաքին քաղաքականությունից եւ պահանջում են կառավարության հրաժարականը: Ոստիկանության եւ ցուցարարների միջեւ բախումների արդյունքում մինչ այժմ 5 մարդ է զոհվել, 7500-ից ավելի մարդ վիրավորվել է, շուրջ 5 հազար մարդ էլ ձերբակալվել է:Թուրքիայի ներքին գործերի նախարարության տվյալներով` մինչ օրս տեղի ունեցած հակակառավարական ցույցերին Թուրքիայի 79 շրջաններից մասնակցել են 2.5 միլիոն մարդ:

AREMNPRESS

Հայաստան, Երևան, 0002, Մարտիրոս Սարյան 22

+374 11 539818

contact@armenpress.am

fbtelegramyoutubexinstagramtiktokspotify

Ցանկացած նյութի ամբողջական կամ մասնակի վերարտադրման համար անհրաժեշտ է «Արմենպրես» լրատվական գործակալության գրավոր թույլտվությունը

© 2024 ARMENPRESS

Ստեղծվել է՝ MATEMAT-ում