Երևանյան բեսթսելլեր 20. «Մայրենի լեզվի դասը» գերազանցեց նախորդ շաբաթվա իր ռեկորդը

ԵՐԵՎԱՆ, 31 ՄԱՅԻՍԻ, ԱՐՄԵՆՊՐԵՍ: Երևանյան գրախանութներում վերջին յոթ օրերի ընթացքում ամենաշատ վաճառված գրքերը մանկական ստեղծագործություններն են, ինչը գրախանութների մենեջերները կապում են հունիսի 1-ի` մանուկների տոնի հետ: «Արմենպրես» լրատվական գործակալության այս շաբաթվա «Երևանյան բեսթսելլեր»-ի առաջատարը նույնպես մանկական ստեղծագործություն է:Հայաստանի գրողների միության նախագահ, գրող Լևոն Անանյանի «Մայրենի լեզվի դասը» մանկական պատմվածքը երկու շաբաթ անընդմեջ ամենաշատ վաճառված ստեղծագործությունն է: Այն գերազանցել է նույնիսկ նախորդ շաբաթվա վաճառքի ցուցանիշը:

Բադիկի պատմությունն այն մասին, թե ինչպես է ընտանիքը որոշում իր ձագուկին տանել շների դպրոց, որն ավելի հեղինակավոր է, և որի շրջանավարտները հետագայում հիմնականում բարձր պաշտոններ են զբաղեցնում, դաստիարակչական նշանակություն ունի ու փոխաբերական իմաստով արդիական է նույնիսկ այսօր: Դա է պատճառը, որ հեղինակը որոշել է տպագրել45 տարի առաջ գրվածպատմվածքը: Գրքում կարևորվում է այն գաղափարը, որ առաջնայինը մայրենի լեզվի պահպանման հարցն է, որի մասին մի պահ չի մտածել բադիկի ընտանիքը, իսկ մայրենիի կորուստը բերում է ցեղի կորստին:

Ժամանակակից գրող լիբանանահայ Վահան Զանոյեանի «Հեռավոր մի տեղ» վեպը, որն առաջին անգամ է ընդգրկվել վարկանիշային աղյուսակում, զբաղեցրել է երկրորդ հորիզոնականը: Երրորդ հորիզոնականում կրկին «Մաշան և արջը» ռուսական մուլտֆիմի սյուժեի հիման վրա գրված հայերեն թարգմանական-գրական գործն է: Այս հեքիաթը բավական մեծ հետաքրքրություն է առաջացրել փոքրիկների շրջանում, ինչն էլ ապահովել է գրքի վաճառքը: Սրան հաջորդում է «Սկյուռիկի երգը» մանկական ստեղծագործությունը, որը կրկին առաջին անգամ է տեղ գտել «Երևանյան բեսթսելլեր»-ի ցանկում: Այն միանգամից մեծ հետաքրքրություն է առաջացրել` մեկ շաբաթվա ընթացքում ապահովելով չորրորդ հորիզոնականը:

«Արմենպրես» լրատվական գործակալության հատուկ նախագծի հինգերորդ հորիզոնականում Զավեն Բեկյանի «Քարե աշտանակ» բանաստեղծությունների վեցերորդ ժողովածուն է, որը տպագրվել է պետական աջակցությամբ: Այն առաջին անգամ է տեղ գտել գործակալության ամենաշատ վաճառված գրքերի ցանկում: Վեցերորդ հորիզոնականում Հովհաննես Թումանյանի` «Բուքինիստ» հրատարակչության հրատարակած «Հեքիաթներ»-ն են, որին հաջորդում է բրազիլացի ժամանակակից գրող Պաուլո Կոելյոյի «Ալքիմիկոսը»: Այն տպագրության առաջին իսկ օրվանից մեծ հետաքրքրություն է առաջացրել հատկապես երիտասարդների շրջանում: Աշխարհի 117 երկրներում 67 լեզուներով թարգմանված այդ գիրքը մինչ այսօր շարունակում է մնալ ամենալավ վաճառվող գիրքը Բրազիլիայի պատմության մեջ և նույնիսկ համարվում է Գինեսի ռեկորդակիր: Ութերորդ հորիզոնականում կոլումբիացի գրող Գաբրիել Գարսիա Մարկեսի «Վերհիշելով իմ տխուր պոռնիկներին» վեպն է:

Ադրբեջանում մեծ աղմուկ բարձրացրած, Հայաստանում հետաքրքրության արժանացած ադրբեջանցի գրող Աքրամ Այլիսլիի «Քարե երազներ» վեպ-ռեքվիեմի` «Գրաբեր» հրատարակչության տարբերակն այս անգամ վարկանիշային աղյուսակի իններորդ հորիզոնականում է: Ադրբեջանցիների կողմից հայերի նկատմամբ վայրագությունները նկարագրող գրիքը, որը Հայաստանում ունեցավ թարգմանական-հրատարակչական երեք տարբերակ, շարունակում է հետաքրքրել հայ ընթերցողին` ամեն շաբաթ հայտնվելով գործակալության վարկանիշային աղյուսակում: «Երևանյան բեսթսելլեր»-ն այս շաբաթ եզրափակում է Հովհաննես Թումանյանի` «Արևիկ» հրատարակչության կողմից հրատարակած «Հեքիաթներ»-ը:

«Երևանյան բեսթսելլեր» նախագծի արդյունքներին կարող եք ծանոթանալ նաև «Գրական թերթ» շաբաթաթերթի այսօրվա համարում: Ամենաշատ գնված հայերեն գեղարվեստական գրքերի ցանկը պատրաստվել է երևանյան յոթ գրախանութների հետ համագործակցության արդյունքում: Հարցումներին մասնակցել են «Նոր գիրք» (093-60-40-64), «Նոյյան տապան» (56-81-84), «Հայ Գիրք» («Մեկ պրինտ») (58-30-59), «Բյուրոկրատ» (50-01-52), «Բուկինիստ» (53-74-13), «Արտ Բրիջ» (58-12-84) և «Զանգակ» (23-25-28) գրախանութները: Հարցման ընթացքում հաշվի չեն առնվել մասնագիտական, տեղեկատվական ու ուսումնական բնույթի գրքերն ու դասագրքերը:

Տեղ	Փոփ.	Գիրք		Հրատ.	Քանակ
1	0		Լևոն Անանյան «Մայրենի լեզվի դասը»	Էդիթ պրինտ	115
2	նոր		Վահան Զանոյեան «Հեռավոր մի տեղ»	Էդիթ պրինտ	37
3	-1		«Մաշան և արջը»	Բուքինիստ	32
4	նոր		«Սկյուռիկի երգը»	Բուքինիստ	24
5	նոր		Զավեն Բեկյան «Կավե աշտանակ»	ՀԳՄ	23
6	-2		Հովհաննես Թումանյան «Հեքիաթներ»	Բուքինիստ	18
7	-2		Պաուլո Կոելյո «Ալքիմիկոսը»	Վան Արյան	16
8	-1		Գաբրիել Գարսիա Մարկես «Վերհիշելով կիմ տխուր պոռնիկներին»	ՎԱ-ՀԱ	14
9	-1		Աքրամ Այլիսլի «Քարե երազներ»	Գրաբեր	11
10	-7		Հովհաննես Թումանյան Հեքիաթներ	Արևիկ	9

«Երևանյան բեսթսելլեր»-ը պատրաստեց Ռուզաննա Մովսիսյանը