«Երևանյան բեսթսելլեր» 17. Շաբաթվա առաջատարը ԱԺ պատգամավորի «Գժանոց կամ թեժ աշուն» գիրքն է

ԵՐԵՎԱՆ, 10 ՄԱՅԻՍԻ, ԱՐՄԵՆՊՐԵՍ: «Արմենպրես»լրատվական գործակալության «Երևանյան բեսթսելլեր» հեղինակային նախագիծը, որն ամեն շաբաթ ներկայացնում է երևանյան գրախանութներում ամենաշատ վաճառված գրքերի ցանկը, այս շաբաթ գլխավորում է Մարգարիտ Եսայանի «Գժանոց կամ թեժ աշուն» գիրքը: Այն ԱԺ պատգամավորի առաջին գիրքն է, որում ներառված են Եսայանի գեղարվեստական նոթերը, պատմվածքները և մեկ վիպակ: Երկրորդ հորիզոնականում «Մաշան և արջը» ռուսական մուլտֆիմի սյուժեի հիման վրա գրված հայերեն թարգմանական-գրական գործն է: Այն վաճառքի առաջին իսկ օրվանից զբաղեցնում է վարկանիշային աղյուսակի առաջատար դիրքերը:

Ադրբեջանցի գրող Աքրամ Այլիսլիի «Քարե երազներ» վեպ-ռեքվիեմը, որը նույնպես մեծ հետաքրքրություն է առաջացրել ընթերցողների շրջանում, այս շաբաթ նույնպես ընդգրկված է «Երևանյան բեսթսելլեր»-ի ցանկում: Երրորդ հորիզոնականում գրքի «Գրաբեր» հրատարակչության հրատարակած տարբերակն է: Սրան հաջորդում է Գրիգոր Նարեկացու «Մատյան ողբերգության» պոեմը: Հինգերորդ հորիզոնականում Աիդա Ազնավուր-Կառվարենցի «Ափարիկս»-ն է:

Վարկանիշայի աղյուսակում վեցերորդ հորիզոնականը բաժին է ընկել Հովհաննես Թումանյանի Հեքիաթներին: Յոթերորդ հորզոնականում կրկին Աքրամ Այլիսլիի` այս անգամ «Նորք» հրատարակչության հրատարակած «Քարե երազներ» վեպն է, որին հաջորդում է կոլումբիացի գրող Գաբրիել Գարսիա Մարկեսի «Վերհիշելով իմ տխուր պոռնիկներին» վեպ:

«Երևանյան բեսթսելլեր» հեղինակային նախագծի նախավերջին` իններորդ հորիզոնականում Մարկ Արենի «Այնտեղ, որտեղ ծաղկում են վայրի վարդեր. Անատոլիական պատմություն»-ն է: Ցանկը եզրափակում է Աքրամ Այլիսլիի` «Էդիթ պրինտ»-ի հրատարակած «Քարակերտ երազներ» վեպ-ռեքվիեմը:

«Երևանյան բեսթսելլեր» նախագծի արդյունքներին կարող եք ծանոթանալ նաև «Գրական թերթ» շաբաթաթերթի այսօրվա համարում: Ամենաշատ գնված հայերեն գեղարվեստական գրքերի ցանկը պատրաստվել է երևանյան յոթ գրախանութների հետ համագործակցության արդյունքում: Հարցումներին մասնակցել են «Նոր գիրք» (093-60-40-64), «Նոյյան տապան» (56-81-84), «Հայ Գիրք» («Մեկ պրինտ») (58-30-59), «Բյուրոկրատ» (50-01-52), «Բուկինիստ» (53-74-13), «Արտ Բրիջ» (58-12-84) և «Զանգակ» (23-25-28) գրախանութները: Հարցման ընթացքում հաշվի չեն առնվել մասնագիտական, տեղեկատվական ու ուսումնական բնույթի գրքերն ու դասագրքերը:

Տեղ	Փոփ.	Գիրք		Հրատ.	Քանակ
1	նոր		Մարգարիտ Եսայան «Գժանոց կամ թեժ աշուն»	Էդիթ պրինտ	64
2	0		«Մաշան և արջը»	Բուքինիստ	39
3	0		ԱքրամԱյլիսլի «Քարեերազներ»	Գրաբեր	21
4	-6		Գրկգոր Նարեկացի «Մատյան ողբերգության»	Նաիրի	18
5	նոր		Աիդա Ազնավուր-Կառվարենց «Ափարիկս»	ՎՄՎ պրինտ	14
6	-2		Հովհաննես Թումանյան «Հեքիաթներ»	Արևիկ	13
7	0		Աքրամ Այլիսլի «Քարե երազներ»	Նորք	12
8	-2		Գարսիա Մարկես «Վերհիշելով իմ տխուր պոռնիկներին»	ՎԱ-ՀԱ	10
9	-3		Մարկ Արեն «Այնտեղ, որտեղ ծաղկում են վայրի վարդեր. Անատոլիական պատմություն»	Տիգրան Մեծ	9
10	+1		Աքրամ Այլիսլի «Քարակերտ երազներ»	Էդիթ պրինտ	8

«Երևանյան բեսթսելլեր»-ը պատրաստեց Ռուզաննա Մովսիսյանը