Թուրքիայում հարձակումներ են տեղի ունեցել քրիստոնեական եկեղեցիների վրա

ԵՐԵՎԱՆ, 29 ԱՊՐԻԼԼԻ, ԱՐՄԵՆՊՐԵՍ: Թուրքիայի արեւմտյան մասում գտնվող Աթաշեհիր եւ Բուրգազ կղզիներում հարձակումներ են տեղի ունեցել քրիստոնեական եկեղեցիների վրա:

Ինչպես հաղորդում է «Արմենպրես»-ը` վկայակոչելով «Ակոս» թերթը, Աթաշեհիրի «Նոր հույս» քրիստոնեական եկեղեցու վրա հարձակումը տեղի է ունեցել ապրիլի 27-ին: Ժամը մոտավորապես 15-ին 30-40 հոգանոց խումբը հարձակվել է եկեղեցու վրա, քարեր նետել, կոտրել շենքի ապակիները եւ փորձել ներս մտնել, ինչը, սակայն, նրանց չի հաջողվել: Այդ պահին եկեղեցում Ֆինլանդիայի մի քաղաքացի է եղել, որը չի տուժել:

Բուրգազում 15-18 տարեկաններից կազմված 10 հոգանոց խումբը հարձակվել է հունական եկեղեցու վրա: Նրանք մտել են եկեղեցի, փորձել են հափշտակել ողորմությունների արկղում առկա գումարը, սակայն չեն հաջողել: Հանցագործները կոտրել են եկեղեցու պահարանը եւ գողացել բոլոր մոմերը: Հատկանշական է, որ թուրքական ԶԼՄ-ներն այդ փաստերին չեն անդրադարձել: