«Երևանյան բեսթսելլեր» 13. «Մաշան և արջը» հեքիաթի ժամանակակից տարբերակը կրկին առաջատար է

ԵՐԵՎԱՆ, 12 ԱՊՐԻԼԻ, ԱՐՄԵՆՊՐԵՍ: «Արմենպրես» լրատվական գործակալության «Երևանյան բեսթսելլեր» հեղինակային նախագծում արդեն երկրորդ անգամ առաջատարն է «Մաշան և արջը» մուլտֆիմի սյուժեի հայերեն թարգմանական-գրական գործը: Երկրորդ հորիզոնականում հայ ժամանակակից գրող Էդուարդ Սաֆարյանի «Մասունքի խորհուրդը» գիրքն է, ինչը գործակալության վարկանիշային աղյուսակում առաջին անգամն է: Լիպարիտ Սարգսյանի «Գանձերս երգերն են իմ» գիրքը ևս ընդգրկված է առաջին անգամ և զբաղեցնում է երրորդ հորիզոնականը:

Ամենաշատ գնված գրքերի ցանկի չորրորդ հորիզոնականում ֆրանսիացի գրող Անտուան դը Սենտ Էքզյուպերիի «Փոքրիկ իշխանը» ստեղծագործությունն է: Գրիգոր Նարեկացու «Մատյան ողբերգության» պոեմը, ինչպես ամեն շաբաթ, այս շաբաթ ևս ընդգրկված է «Երևանյան բեսթսելլեր» նախագծում: Այս անգամ այն զբաղեցնում է հինգերորդ հորիզոնականը: Վեցերորդ և յոթերորդ հորիզոնականները համապատասխանաբար զբաղեցնում են Հովհաննես Թումանյանի և Ղազարոս Աղայանի հեքիաթները, որոնց հաջորդում է նախորդ երկու շաբաթներում անընդմեջ առաջատար գրանցված Արմեն Օհանյանի «Կիկոսի վերադարձը»: Իններորդ հորիզոնականում Ջորջ Օրուելի արգելված գրքերից «1984»-ն է, որը պարբերաբար է հայտնվում գործակալության վարկանիշային աղյուսակում: «Արմենպրես» լրատվական գործակալության ամենաշատ գնված գրքերի ցանկն այս շաբաթ եզրափակում է «Սպիտակաձյունիկ» հեքիաթի գիրք-տիկնիկը:

«Երևանյան բեսթսելլեր» նախագիծը, որը հետաքրքրություն է առաջացրել գրողների, հրատարակչությունների և ընթերցողների շրջանում, շարունակվում է հրապարակվել «Գրական թերթ» շաբաթաթերթում:

Ամենաշատ գնված հայերեն գեղարվեստական գրքերի ցանկը պատրաստվել է երևանյան յոթ գրախանութների հետ համագործակցության արդյունքում: Հարցումներին մասնակցել են «Նոր գիրք» (093-60-40-64), «Նոյյան տապան» (56-81-84), «Հայ Գիրք» («Մեկ պրինտ») (58-30-59), «Բյուրոկրատ» (50-01-52), «Բուկինիստ» (53-74-13), «Արտ Բրիջ» (58-12-84) և «Զանգակ» (23-25-28) գրախանութները:

Հարցման ընթացքում հաշվի չեն առնվել մասնագիտական, տեղեկատվական ու ուսումնական բնույթի գրքերն ու դասագրքերը: «Արմենպրես»-ն ընդլայնելու է հարցումների ցանցը` ներառելով նոր գրախանութներ, տվյալներն առավել համակողմանի ու հետաքրքական դարձնելու նպատակով:

Տեղ	Փոփ.	Գիրք		Հրատ.	Քանակ
1	+1		Մաշան և արջը	Բուկինիստ	57
2	Նոր		Էդուարդ Սաֆարյան «Մասունքի խորհուրդը»	Անտարես	45
3	Նոր		Լիպարիտ Սարգսյան «Գանձերս երգերն են իմ»	Էդիտ Պրինտ	37
4	+4		Անտուան դը Սենտ Էքզյուպերի «Փոքրիկ իշխանը»	Անտարես	22
5	-1		Գրիգոր Նարեկցի «Մատյան ողբերգության»	Նաիրի	20
6	-1		Հովհաննես Թումանյան «Հեքիաթներ »	Արևիկ	15
7	+1		Ղազարոս Աղայան «Հեքիաթներ »	Արևիկ	13
8	-7		Արմեն Օհանյան «Կիկոսի վերադարձը»	Անտարես	10
9	-4		Ջորջ Օրուել «1984»	Անտարես	7
10	Նոր		«Սպիտակաձյունիկը»	Բուկինիստ	6

«Երևանյան բեսթսելլեր»-ը ներկայացրեց Ռուզաննա Մովսիսյանը