Երևանյան բեսթսելլեր 12. «Կիկոսի վերադարձը» շարունակում է մնալ ամենաշատ վաճառված գիրքը

ԵՐԵՎԱՆ, 5 ԱՊՐԻԼԻ, ԱՐՄԵՆՊՐԵՍ: «Արմենպրես» լրատվական գործակալության «Երևանյան բեսթսելլեր» հեղինակային նախագծում Արմեն Օհանյանի «Կիկոսի վերադարձն» առաջատարն է երկրորդ շաբաթն անընդմեջ: Թեեւ նախորդ յոթ օրերին գրքի վաճառքի տեմպերը նվազել են, սակայն այն կրկին գլխավորում է բեսթսելլերների ցանկը (նախորդ շաբաթ վաճառվել էր գրքի 225, այս շաբաթ` 60 օրինակ): Հայտնի «Մաշան և արջը» մուլտֆիմի սյուժեի հայերեն թարգմանական-գրական գործը, որը ևս նախորդ շաբաթներին աննախադեպ մեծ թվով էր վաճառվել, այս շաբաթ զբաղեցնում է երկրորդ հորիզոնականը: Բրազիլացի ժամանակակից գրող Պաուլո Կոելոյի «Ալքիմիկոսը» զբաղեցնում է երրորդ հորիզոնականը:

Գրիգոր Նարեկացու «Մատյան ողբերգության» պոեմը գործակալության վարկանիշային աղյուսակում չորրորդ հորիզոնականում է: Հովհաննես Թումանյանի հեքիաթներն, ինչպես նախորդ շաբաթ, այս շաբաթ ևս զբաղեցնում են հինգերորդ հորիզոնականը, որին հաջորդում է Մարկ Արենի` հայ ժամանակակից գրող Կարեն Մարգարյանի «Այնտեղ, որտեղ ծաղկում են վայրի վարդեր. Անատոլիական պատմություն» գիրքը:

Կոլոմբիացի վիպասան Գաբրիել Գարսիա Մարկեսի «Վերհիշելով իմ տխուր պոռնիկներին» վիպակը «Երևանյան բեսթսելլեր» նախագծում զբաղեցնում է յոթերորդ հորիզոնականը, իսկ ֆրանսիացի գրող Անտուան դը Սենտ Էքզյուպերիի «Փոքրիկ իշխանը» ութերորդ հորիզոնականում է:

Վարկանիշային աղյուսակում առաջին անգամ տեղ գտած ամերիկացի գրող Էռնեստ Հեմինգուեյի «Ծերունին ու ծովը» վիպակը զբաղեցնում է իններորդ հորիզոնականը: «Արմենպրես» լրատվական գործակալության ամենաշատ գնված գրքերի ցանկն այս շաբաթ եզրափակում է Նվարդ Վարդանյանի «Զրուցասեր գունապնակ» գիրքը:

«Երևանյան բեսթսելլեր»-ը հրապարակվում է նաև «Գրական թերթ» շաբաթաթերթում:

Ամենաշատ գնված հայերեն գեղարվեստական գրքերի ցանկը պատրաստվել է երևանյան յոթ գրախանութների հետ համագործակցության արդյունքում: Հարցումներին մասնակցել են «Նոր գիրք» (093-60-40-64), «Նոյան տապան» (56-81-84), «Հայ Գիրք» («Մեկ պրինտ») (58-30-59), «Բյուրոկրատ» (50-01-52), «Բուքինիստ» (53-74-13), «Արտ Բրիջ» (58-12-84) և «Զանգակ» (23-25-28) գրախանութները:

Հարցման ընթացքում հաշվի չեն առնվել մասնագիտական, տեղեկատվական ու ուսումնական բնույթի գրքերն ու դասագրքերը: «Արմենպրես»-ն ընդլայնելու է հարցումների ցանցը` ներառելով նոր գրախանութներ, տվյալներն առավել համակողմանի ու հետաքրքական դարձնելու նպատակով:

Տեղ	Փոփ.	Գիրք		Հրատ.	Քանակ
1	0		Արմեն Օհանյան «Կիկոսի վերադարձը»	Անտարես	60
2	+2		Մաշան և արջը	Բուքինիստ	57
3	+1		Պաուլո Կուելո «Ալքիմիկոսը»	Անտարես	19
4	+2		Գրիգոր Նարեկացի «Մատյան ողբերգության»	Նաիրի	18
5	+3		Հովհաննես Թումանյան Հեքիաթներ	Արևիկ	13
6	+4		Մարկ Արեն «Այնտեղ, որտեղ ծաղկում են վայրի վարդեր. անատոլիական պատմություն»	Տիգրան Մեծ	10
7	0		Գաբրիել Գարսիա Մարկես «Վերհիշելով իմ տխուր պոռնիկներին»		9
8	+1		Անտուան դը Սենտ Էքզյուպերի «Փոքրիկ իշխանը»	Անտարես	8
9	Նոր		Էռնեստ Հեմինգուեյ «Ծերունին ու ծովը»	Անտարես	7
10	Նոր		Նվարդ Վարդանյան «Զրուցասեր գունապնակ»	Ակտուալ արվեստ	6

«Երևանյան բեսթսելլեր»-ը ներկայացրեց Ռուզաննա Մովսիսյանը