Երևանյան բեսթսելլեր 9. Զորի Բալայանի «Հաղթելով մահին» հուշագրությունն առաջատարն է

ԵՐԵՎԱՆ, 15 ՄԱՐՏԻ, ԱՐՄԵՆՊՐԵՍ: «Արմենպրես» լրատվական գործակալության «Երևանյան բեսթսելլեր» հեղինակային նախագծում առաջին անգամ ընդգրկված ժամանակակից գրող, արձակագիր Զորի Բալայանը միանգամից գլխավորեց այս շաբաթվա ամենաշատ գնված գրքերի ցանկը: Նրա «Հաղթելով մահին» գիրքը, որը գրվել է խրամատներում` պատերազմի տարիներին, բավականին շատ ընթերցողների է հետաքրքրել: Վարկանիշային աղյուսակի երկրորդ հորիզոնականում բրազիլացի ժամանակակից գրող Պաուլո Կոելյոյի «Ալքիմիկոսը» գիրքն է, որը առավել շատ հետաքրքրություն է առաջացնում երիտասարդների շրջանում: Վանիկ Սանթրյանի «Լևոն Գաթրճյանի երգն ու տաղը» գիրքը, որը նույնպես առաջին անգամն է ընդգրկված գործակալության վարկանիշային աղյուսակում, զբաղեցնում է երրորդ հորիզոնականը:

Չորրորդ հորիզոնականում «Նարեկ»-ն է` Գրիգոր Նարեկացու «Մատյան ողբերգության» պոեմը: Մարդիկ շարունակում են հավատալ նրա բուժիչ հատկություններին, ինչի շնորհիվ այս գիրքը յուրաքանչյուր շաբաթ ընդգրկվում է ամենաշատ գնված գրքերի ցանկում: «Նարեկ»-ին հաջորդում է հայ ժամանակակից արձակագիր Մարկ Արենի` Կարեն Մարգարյանի, «Այնտեղ, որտեղ ծաղկում են վայրի վարդեր. անատոլիական պատմություն»-ը: Այս գիրքը ևս առաջին անգամն է ներառվել «Երևանյան բեսթսելլեր»-ի լավագույն տասնյակում: Վեցերորդ հորիզոնականում ֆրանսիացի գրող Անտուան դը սենտ Էքզյուպերիի «Փոքրիկ իշխան»-ն է: Գործակալության վարկանիշային աղյուսակում ընդգրկված ֆրանսիացի գրող, մանկագիր Շարլ Պերրոյի «Մոխրոտիկը» հեքիաթը յոթերորդ հորիզոնականում է, ինչն առաջին անգամն է տեղ գտել ցանկում: Հովհաննես Թումանյանի հեքիաթները, որը զբաղեցնում է ութերորդ հորիզոնականը, կրկին պարբերաբար եղել է առաջիններից: Իններորդ հորիզոնականում ժամանակակից հայ գրող Արամ Պաչյանի «Ռոբինզոն» գիրքն է, որին հաջորդում է կրկին ժամանակակից հայ գրող Աշոտ Աղաբաբյանի «Մենակը» վեպը:«Երևանյան բեսթսելլեր»-ը հրապարակվում է նաև «Գրական թերթ» շաբաթաթերթում:

Ամենաշատ գնված հայերեն գեղարվեստական գրքերի ցանկը պատրաստվել է երևանյան յոթ գրախանութների հետ համագործակցության արդյունքում: Հարցումներին մասնակցել են «Նոր գիրք» (093-60-40-64), «Նոյան տապան» (56-81-84), «Հայ Գիրք» («Մեկ պրինտ») (58-30-59), «Բյուրոկրատ» (50-01-52), «Բուքինիստ» (53-74-13), «Արտ Բրիջ» (58-12-84) և «Զանգակ» (23-25-28) գրախանութները:

Հարցման ընթացքում հաշվի չեն առնվել մասնագիտական, տեղեկատվական ու ուսումնական բնույթի գրքերն ու դասագրքերը: «Արմենպրես»-ն ընդլայնելու է հարցումների ցանցը` ներառելով նոր գրախանութներ, տվյալներն առավել համակողմանի ու հետաքրքական դարձնելու նպատակով:

Տեղ	Փոփ.	Գիրք		Հրատ.	Քանակ
1	Նոր		Զորի Բալայան «Հաղթելով մահին»	Ամարաս	20
2	+3		ՊաուլոԿոելոյի «Ալքիմիկոսը»	ՎանԱրյան	17
3	Նոր		Վանիկ Սանթրյանի «Լեւոն Գաթրճյանի երգն ու տաղը»	ՎՄՎ պրինտ	15
4	0		Գրիգոր Նարեկացի «Մատյան ողբերգության»	Նաիրի	14
5	Նոր		Մարկ Արեն «Այնտեղ, որտեղ ծաղկում են վայրի վարդեր. Անատոլիական պատմություն»	Տիգրան Մեծ	12
6	-4		Անտուան դը Սենտ Էքզյուպերի «Փոքրիկ իշխանը»	Անտարես	11
7	Նոր		Շարլ Պերրո «Մոխրոտիկը»	Բուքինիստ	9
8	-5		ՀովհաննեսԹումանյան «Հեքիաթներ»	Արևիկ	8
9	Նոր		Արամ Պաչյան «Ռոբինզոն»	Անտարես	6
10	-2		ԱշոտԱղաբաբյան «Մենակը»	Լուսակն	5

«Երևանյան բեսթսելլեր»-ը ներկայացրեց Ռուզաննա Մովսիսյանը