Երևանյան բեսթսելլեր 5. Նարեկացու «Մատյան ողբերգության»-ն ամենաշատ գնված գիրքն է

ԵՐԵՎԱՆ, 15 ՓԵՏՐՎԱՐԻ, ԱՐՄԵՆՊՐԵՍ: «Երևանյան բեսթսելլեր»-ի առաջատարների ցանկում պարբերաբար տեղ գտած Գրիգոր Նարեկացու «Մատյան ողբերգության» պոեմն այս շաբաթ կրկին առաջատարն է: Նախորդ երկու շաբաթների ընթացքում պոեմը, զիջելով իր տեղը ժամանակակից գրականությանը, այնուամենայնիվ, ամենաշատ գնված գրքերի տասնյակից դուրս չէր մնացել: Երկրորդ հորիզոնականում Աստրիդ Լինդգրենի «Երկարագուլպա Պիպի» հեքիաթն է, ինչը մեր ցանկում առաջին անգամն է: Բերնհարդ Շլինկի «Ընթերցողը», որը զբաղեցնում է երրորդ հորիզոնականը, կրկին առաջին անգամն է ներգրավվում «Արմենպրես»-ի ներկայացրած` ամենաշատ գնված գրքերի ցանկում: «Երևանյան բեսթսելլեր»-ի չորրորդ հորիզոնականում ժամանակակից գրող Նելլի Շահնազարյանն է` իր «Ընտրանի» ստեղծագործությամբ: «Ընտրանի»-ն արդեն երրորդ շաբաթն է` ընդգրկված է «Երևանյան բեսթսելլեր»-ում: Վարկանիշային աղյուսակի հինգերորդ հորիզոնականում Արտակ Մովսիսյանի «10 հայ ականավոր արքաները» գիրքն է:

Գործակալության վարկանիշային աղյուսակում միշտ իրենց առանձնահատուկ տեղն ունեն հեքիաթները: Հովհաննես Թումանյանի հեքիաթների ժողովածուն այս անգամ վեցերորդ հորիզոնականում է:

Ամենաշատ գնված գրքերի ցանկի յոթերորդ հորիզոնականում կրկին ժամանակակից գրականություն է` Լարիսա Գևորգյանի «Երեք օրից հետո կգամ, մամ...» ստեղծագործությունը, ինչն արդեն երկրորդ շաբաթն է` համարվում է շաբաթվա ամենաշատ գնված գրքերից մեկը:

Երկու շաբաթ պարբերաբար վարկանիշային աղյուսակի առաջին հորիզոնականն զբաղեցրած Համբարձում Գալստյանի «Չուղարկված նամակներ» հուշագիրն այս անգամ ութերորդ տեղում է: «Արմենպրես» լրատվական գործակալության վարկանիշային աղյուսակը եզրափակում են Ղազարոս Աղայանի, այնուհետև Հանս Քրիստեան Անդերսենի հեքիաթները` համապատասխանաբար` իններորդ և տասներորդ հորիզոնականներում:

Ինչպես արդեն տեղեկացրել ենք, այսուհետև «Երևանյան բեսթսելլեր»-ը հրապարակվում է նաև «Գրական թերթ» շաբաթաթերթում:

Ամենաշատ գնված հայերեն գեղարվեստական գրքերի ցանկը պատրաստվել է երևանյան յոթ գրախանութների հետ համագործակցության արդյունքում: Հարցումներին մասնակցել են «Նոր գիրք» (093-60-40-64), «Նոյան տապան» (56-81-84), «Հայ Գիրք» («Մեկ պրինտ») (58-30-59), «Բյուրոկրատ» (50-01-52), «Բուքինիստ» (53-74-13), «Արտ Բրիջ» (58-12-84) և «Զանգակ» (23-25-28) գրախանութները: Հարցման ընթացքում հաշվի չեն առնվել մասնագիտական, տեղեկատվական ու ուսումնական բնույթի գրքերն ու դասագրքերը: «Արմենպրես»-ն ընդլայնելու է հարցումների ցանցը` ներառելով նոր գրախանութներ, տվյալներն առավել համակողմանի ու հետաքրքական դարձնելու նպատակով:

«Երևանյան բեսթսելլեր»-ը ներկայացրեց Ռուզաննա Մովսիսյանը