Երևանյան բեսթսելլեր 3. Փոխվել է «Արմենպրես»-ի ռեյթինգի առաջատարը

ԵՐԵՎԱՆ, 1 ՓԵՏՐՎԱՐԻ, ԱՐՄԵՆՊՐԵՍ: «Արմենպրես» լրատվական գործակալության հարցումների արդյունքում երևանյան գրախանութներից հունվարի վերջին յոթօրյակում ամենաշատ գնված գրքերի ցանկն այս անգամ գլխավորւմ է Համբարձում Գալստյանի «Չուղարկված նամակներ» վավերագիրքը` նվիրված Ղարաբաղյան շարժման 25-ամյակին: Երկրորդ տեղում Հովհաննես Թումանյանի «Հեքիաթներ»-ի ժողովածուն է, որը նախորդ երկու շաբաթներում գլխավորում էր «Արմենպրես»-ի վարկանիշային աղյուսակը: Երրորդ տեղում մշտապես արդիական ու պահանջված Գրիգոր Նարեկացու «Մատյան ողբերգության» պոեմն է: Շաբաթվա ամենագնված գրքերի չորրորդ հորիզոնականում Հենրի Միլլերի «Խեցգետնի արևադարձը» գիրքն է: Այն նախորդ շաբաթ հինգերորդ հորիզոնականում էր, որն այս շաբաթ զբաղեցրել է Հանս Քրիստիան Անդերսենի «Հեքիաթներ»-ի գիրքը: Այս գիրքը երեք հորիզոնականով զիջել է դիրքերը. նախորդ շաբաթ այն լավագույն տասնյակի երկրորդ հորիզոնականում էր: Շաբաթվա ամենաշատ գնված գրքերի վեցերորդ հորիզոնականում Շառլ Պեռոյի «Կարմիր գլխարկըե հեքիաթն է, որն այս աղյուսակում առաջին անգամն է: Սրան հաջորդում է Պաուլո Կոելոյի «Ալքիմիկոսը»: Այս գիրքն անցնող շաբաթ ավելի մեծ հետաքրքրություն է առաջացրել, քան նախորդում, քանի որ նախորդ շաբաթվա ընթացքում այն եզրափակում էր վարկանիշային աղյուսակը: Ցուցակում առաջին անգամ տեղ է գտել նաև Միխայիլ Բուլգակովի «Վարպետը և Մարգարիտան» վեպը: Այն զբաղեցնում է ութերորդ հորիզոնականը: Վարկանիշային աղյուսակի վերջին երկու հորիզոնականներում Ղազարոս Աղայանի «Հեքիաթներ» ժողովածուն և Եղիշե Չարենցի «Հատընտիր» գրքերն են:

«Արմենպրես»-ի գործընկեր-գրախանութները հայտնում են իրենց պատրաստակամությունը` յուրաքանչյուր շաբաթ ներկայացնելու ամենաշատ գնված գրքերի ցուցակը: Գործակալության նախաձեռնությունը մեծ ուշադրության է արժանացել նաև գրքասեր հասարակության և ժամանակակից գրողների կողմից: Սրա շնորհիվ «Երևանյան բեսթսելլեր»-ն այսուհետ կտպագրվի նաև «Գրական թերթ»շաբաթաթերթում:

Ամենաշատ գնված հայերեն գեղարվեստական գրքերի ցանկը պատրաստվել է երևանյան վեց գրախանությների հետ համագործակցության արդյունքում: Հարցումներին մասնակցել են «Նոր գիրքե, «Նոյան տապան», «Հայ Գիրք» («Մեկ պրինտ»), «Բյուրոկրատ», «Բուքինիստ» և «Արտբրիջ» գրախանութները: Հարցման ընթացքում հաշվի չեն առնվել մասնագիտական, տեղեկատվական ու ուսումնական բնույթի գրքերն ու դասագրքերը: «Արմենպրես»-ն ընդլայնելու է հարցումների ցանցը` ներառելով նոր գրախանութներ, տվյալներն առավել համակողմանի ու հետաքրքական դարձնելու նպատակով:

Տեղ	Փոփ.	Գիրք		Հրատարակչություն	Քանակը
1	ՆՈՐ		Համբարձում Գալստյան «Չուղարկված նամակներ»	Գասպրինտ	31
2	-1		Հովհաննես Թումանյան «Հեքիաթները»	Արևիկ	22
3	+4		Գրիգոր Նարեկացի «Մատյան ողբերգության»	Նաիրի	19
4	+1		Հենրի Միլլեր «Խեցգետնի արևադարձը»	Անտարես	18
5	+1		Հանս Քրիստիան Անդերսեն «Հեքիաթները»	Արևիկ	16
6	ՆՈՐ		Շառլ Պեռո «Կարմիր գլխարկը»	Ջի ԷՍ ԷՄ	11
7	+3		Պաուլո Կուելո «Ալքիմիկոսը»	Վան Արյան	9
8	ՆՈՐ		Միխայիլ Բուլգակով «Վարպետը և Մարգարիտան»	Անտարես	8
9	-3		Ղազարոս Աղայան «Հեքիաթներ»	Արևիկ	7
10	ՆՈՐ		Եղիշե Չարենց «Հատընտիր»	Անտարես	5