Տիգրան Պետրոսյանի բազում երազանքներից է աշխարհի լավագույն 20 շախմատիստների ցանկում ընդգրկվելը
3 րոպեի ընթերցում
ԵՐԵՎԱՆ, 22 ՀՈՒՆՎԱՐԻ, ԱՐՄԵՆՊՐԵՍ: Հայաստանի շախմատի տղամարդկանց չեմպիոն Տիգրան Լեւոնի Պետրոսյանի երազանքները շատ վառ են եւ պայծառ: Օլիմպիական կրկնակի չեմպիոնը խոստանում է ընթացիկ տարում անել ամեն ինչ շախմատային տարում նորանոր վերելքների հասնելու համար: «Արմենպրես»-ը ներկայացնում է Հայաստանի կրկնակի չեմպիոնի` Տիգրան Լեւոնի Պետրոսյանի տարվա առաջին հարցազրույցը:
-Երկարեւ, իհարկե, ուժասպառ անող Հայաստանի այս առաջնությունում, ո՞րն էհիշարժան պարտիան Ձեզ համար:
-Կարեւոր պարտիաներն առաջին երկուսն էին ինձ համար: Չհաշված վերջինը` իր լարվածությամբ, որովհետև մեկնարկային տուրերում իմ մրցակիցներն Արման Փաշիկյանն եւ Հրանտ Մելքումյանն էին , եւ եթե իրենք հաղթեին, ապա համոզված եմ, որ նույն պատկերը կլիներ, բայց իրենց օգտին: Հենց Արմանին եւ Հրանտին հաղթելուց հետո հասկացա, որ կարող եմ չեմպիոնի տիտղոսը պահպանել:
-Արդեն Հայաստանի չեմպիոն եք, ինչպիսի՞ն են սպասելիքներդ ընթացիկ տարուց:
-Բավականի հետաքրքիր տարի է սպասվում: Հավաքականի հետ մասնակցելու եմ աշխարհի եւ Եվրոպայի թիմային առաջնություններին: Կան նաև մի շարք այլ մրցաշարեր ու անհատական մրցումներ, Եվրոպայի առաջնություն: Կփորձեմ ակտիվ լինել շախմատային բոլոր մրցաշարերում:
-Տիգրան, եթե գնահատելու լինեք այս առաջնությունը` մեկից- հինգ միավորով, քանի՞ միավոր կտայիք :
- Մոտավորապես` չորս:
-Արդյո՞ք շախմատը Ձեզ համար աշխատանք է, թե՞...
-Շախմատն ինձ համար աշխատանք է: Քանի որ արդեն 23 տարի է ինչ զբաղվում եմ շախմատով, եւ ապրուստի համար իմ գումարը վաստակում եմ շախմատով: Բնականաբար, այն աշխատանք է դառնում արդեն:
-Ո՞րն է Ձեր սիրելի խաղաքարը:
-Մի քիչ հարաբերական է, քանի որ դրանք ըստ ուժի են` թագուհի, նավակ, փիղ, ձի: Բայց ես ավելի շատ սիրում եմ ձիով խաղալ:
-Մոտակա եւ հեռավոր ի՞նչ երազանքներ ունի Տիգրան Պետրոսյանը:
-Երազանքներս վառ են, պայծառ եւ հուսամ, որ կիրականան: Եթե շախմատային առումով վերցնենք, ապա մեծ ցանկություն ունեմ գործակիցս բարձրացնել, որպեսզի կարողանամ մտնել աշխարհի 20 լավագույն շախմատիստների մեջ: Սրանք ավելի իրական են, բայց ավելի բարձր երազանքներ էլ ունեմ, գուցե դրանք երազանքներ էլ մնան:
Հարցազրույցը` Վարվառա Հայրապետյանի