1 րոպեի ընթերցում
ԵՐԵՎԱՆ, 21 ԴԵԿՏԵՄԲԵՐԻ, ԱՐՄԵՆՊՐԵՍ: Մայքլ Ջեքսոնի Swarovski քարերով զարդարված սեւ ձեռնոցը Լոս Անջելեսի աճուրդում վաճառվել է 200 հազար ԱՄՆ դոլարով: Ինչպես հաղորդում է «Արմենպրես»-ը` վկայակոչելով ռուսական լրատվամիջոցները, ձեռնոցը, որ զույգ չունի, Ջեքսոնը կրել էր 1984 թվականին Ամերիկյան երաժշտական մրցանակաբախշության ժամանակ: Այդ ժամանակ փոփ արքան պարգեւատրվել էր իր ամենահայտնի` Thriller ալբոմի համար: Երբ նրան հարցրել են, թե ինչո՞ւ է մեկ ձեռնոցով, նա պատասխանել է, որ մեկ ձեռնոցը հզոր է երկուսից:
Բարեգործական արարողություններից մեկի ժամանակ Ջեքսոնն իր ձեռնոցն անձամբ նվիրել էր անբուժելի հիվանդությամբ տառապող երեխաներից մեկին:
Տեղեկություններ չեն հաղորդվում, թե ինչպես է ձեռնոցը հայտնվել Nate D. Sanders աճուրդի տան տրամադրության տակ:
Մայքլ Ջեքսոնը մահացել է 2009 թվականին` 51 տարեկան հասակում: