Արցախի դրոշը ծածանած Անաստասիա Պետրիկը մեծ սիրով կրկին կայցելի Արցախ. պատմում է «Մանկական Եվրատեսիլ 2012» հաղթողի մայրը
3 րոպեի ընթերցում
ԵՐԵՎԱՆ, 3 ԴԵԿՏԵՄԲԵՐԻ, ԱՐՄԵՆՊՐԵՍ: «Մանկական Եվրատեսիլ 2012» միջազգային մրցույթի հաղթող Անաստասիա Պետրիկը տպավորված է մրցույթում Հայաստանը ներկայացրած եւ երրորդ տեղը գրաված Compass band-ի հայ տղաներից: Ուկրաինայից` «Արմենպրես»-ի թղթակցի հետ զրույցում 10-ամյա երգչուհու մայրը` Տատյանա Պետրիկը նշեց, որ Նաստյան պատվիրակության կազմի հետ արդեն վերադարձել է Ուկրաինա:
«Մենք շատ տպավորված ենք Compass band-ի տղաներով, նրանք ոչ միայն շատ տաղանդավոր են, հրաշալի նվագում են եւ երգում, այլեւ շատ դաստիարակված են: Մի խոսքով` իսկական ջենթլմեններ են»,- ասաց երգչուհու մայրը: Նա նշեց, որ երեխաները հասցրել են մրցույթի շրջանակներում ընկերանալ եւ մտերմանալ:«Շատ հաճելի էր նման երեխաների հետ ծանոթանալը եւ հուսանք, որ այդ ընկերությունը շարունակական կդառնա»,- ասաց Տատյանա Պետրիկը:
«Մանկական Եվրատեսիլ 2012»-պրոմո տուրերի շրջանակերում Պետրիկի առաջին համերգը տեղի էր ունեցել սեպտեմբերի 2-ինՍտեփանակերտում` Արցախի անկախության տոնի առթիվ:«Նաստյան ոչ միայն լավ համերգ ունեցավ Արցախում, այլեւ Արցախի բարբառով երգ կատարեց»,- պատմեց երգչուհու մայրը` ընդգծելով, որ հրավեր ստանալու դեպքում մեծ սիրով նորից կայցելեն Արցախ եւ Հայաստան` համերգներ տալու:Սոցիալական ցանցերում լայն տարածում են գտել այն նկարները, որտեղ «Մանկական Եվրատեսիլ 2012»-ի այս տարվա հաղթողը լայն ժպիտով ծածանում է Արցախի դրոշը:
Պետրիկի մայրը նշեց, որ մինչ տարեվերջ երգչուհին կմասնակցի ամանորի ծրագրերի նկարահանումներին եւ կզբաղվի դասերով` ուսումնական կիսամյակը բարեհաջող ավարտելու համար:
Ուկրաինացի փոքրիկ երգչուհին ոչ միայն «Մանկական նոր ալիք 2010»-ի, այլեւ միջազգային այլ մրցույթների հաղթող է` իր քրոջ` Վիկտորիա Պետրիկի հետ միասին:Նրա քույր Վիկտորիան արդեն հասցրել է գրավել երկրորդ տեղը «Մանկական Եվրատեսիլ 2008»-ում: Առաջին անգամ փոքրիկ երգչուհուն ճանաչում է բերել ուկրաինական`«Україна має талант»մրցույթի նախընտրական փուլին մասնակցությունը:Հանրահայտ կոմպոզիտոր Իգոր Կրուտոյը Պետրիկին անվանել է «երկնքից իջած հրեշտակ»` իր տաղանդի եւ հմայքի համար:
Փոքր հասակում արդեն երգչուհին համերգներով է հանդես եկել Իտալիայում, Ռուսաստանի եւ Ուկրաինայի տարբեր քաղաքներում: Դուետներ է ունեցել Լեոնիդ Ագուդինի, Ֆիլիպ Կիրկորովի, այլ հայտնիների հետ: