Խաթարված հեղինակությամբ Ալիեւը չի համարձակվի հարվածել Ստեփանակերտի օդանավակայանին. քաղաքագետ

ԵՐԵՎԱՆ, 4 ԴԵԿՏԵՄԲԵՐԻ, ԱՐՄԵՆՊՐԵՍ: Ստեփանակերտի օդանավակայանից թռչող քաղաքացիական ինքնաթիռներին հարվածելու Ադրբեջանի սպառնալիքների իրագործումը անհնար է երկու պատճառներով: «Արմենպրես»-ի հետ զրույցում նման համոզմունք հայտնեց ռուսաստանաբնակ քաղաքագետ Տիգրան Մանասյանը: «Առաջին՝ Ադրբեջանի ինքնաթիռները թռչում են Լեռնային Ղարաբաղի Հանրապետության և Հայաստանի տարածքներով, և ոչ ոք չի պատրաստվում հարվածել դրանց, երկրորդ` քաղաքացիական ինքնաթիռներին հարվածելը միջազգային հանցագործություն է, ինչին Բաքուն հազիվ թե գնա»,- ընդգծեց քաղաքագետը:

Մանասյանը նշեց, որ Ադրբեջանի ղեկավարի հեղինակությունն առանց այդ էլ խաթարվել է նրա վերջին գործողությունների՝ Սաֆարովի ազատ արձակման, հայերին ադրբեջանական ժողովրդի թշնամի հռչակելու և հարևան երկրների դեմ չդադարող ռազմական հռետորաբանության արդյունքում:

Ստեփանակերտի օդանավակայանը կառուցվել է 1974 թվականին եւ հիմնականում չվերթներ է ընդունել Երեւանից ու Բաքվից: 1992 թվականից օդանավակայանը մատնվել է պարապուրդի: 2008 թվականին սկսվել է օդանավակայանի նոր` գլխավոր մասնաշենքի կառուցումը, որը նման է թեւերը բացած արծվի:Ադրբեջանի իշխանությունները սպառնում էին, որ օդանավակայանի շահագործման դեպքում հարվածելու են քաղաքացիական օդանավերին: Ադրբեջանական այս հայտարարությունները դատապարտեց նաեւ միջազգային հանրությունը: