Հայկական համայնքը վստահ է, որ Ֆրանսուա Օլանդը կկատարի հայերին տրված խոստումները

ԵՐԵՎԱՆ, 12 ՆՈՅԵՄԲԵՐԻ, ԱՐՄԵՆՊՐԵՍ: Ֆրանսիայում հայկական համայնքի և Ֆրանսիայի նախագահ Ֆրանսուա Օլանդի համատեղ ճաշկերույթն անցել է ջերմ մթնոլորտում, և հայկական համայնքը վստահ է, որ նախագահը կկատարի հայերին տված բոլոր խոստումները: «Արմենպրես»-ի հետ զրույցում նման վստահություն հայտնեց Ֆրանսիայի հայկական կազմակերպությունների (CCAF) համանախագահ Մուրադ Փափազյանը:

«Ֆրանսիայի նախագահ Ֆրանսուա Օլանդն իր խոսքում հիշեց իր կապերը Հայաստանի և հայ ժողովրդի հետ, ինչպես նաև անդրադարձավ այն հարցերին, որոնք արդեն հաստատված էին Ֆրանսիայում: Մասնավորապես, Օլանդը խոստացավ, որ կաշխատի Հայոց ցեղասպանության ժխտումը քրեականացնող օրինագծի շուրջ և նպատակ կդնի նպաստել, որպեսզի այն ընդունվի Սահմանադրական դատարանի կողմից»,- ասաց Փափազյանը:

Ֆրանսիայի նախագահն, ըստ Փափազյանի, խոստացել է անել ամեն ինչ, որպեսզի այս օրինագիծն օրենքի ուժ ստանա: Վկայակոչելով Օլանդի խոսքերը` Փափազյանն ասաց, որ արդեն մի շարք մասնագետներ աշխատում են այս օրինագիծը նոր տեսքի բերելու ուղղությամբ:

Փափազյանի խոսքով` Օլանդը կարևորել է նաև Հայաստան- Ֆրանսիա տնտեսական կապերը` ցանկանալով, որպեսզի Ֆրասիան էլ ավելի ամրապնդի կապերը հայկական համանքի հետ:

Ելիսեյան պալատում կայացել է Հայաստանի եւ Ֆրանսիայի նախագահներ Սերժ Սարգսյանի եւ Ֆրանսուա Օլանդի հանդիպումը: Հայաստանի Հանրապետության և Ֆրանսիայի Հանրապետության միջև դիվանագիտական հարաբերությունները հաստատվել են 1992թ. փետրվարի 24-ին: 2009թ. հոկտեմբերի 2-ին Ֆրանսիայում ՀՀ արտակարգ և լիազոր դեսպան է նշանակվել Վիգեն Չիտեչյանը: 2010թ. նոյեմբերի 5-ին Հայաստանում Ֆրանսիայի Հանրապետության արտակարգ և լիազոր դեսպան Անրի Ռենոն իր հավատարմագրերն է հանձնել ՀՀ Նախագահ Սերժ Սարգսյանին: