2 րոպեի ընթերցում
ԵՐԵՎԱՆ, 2 ՆՈՅԵՄԲԵՐԻ, ԱՐՄԵՆՊՐԵՍ: Թուրքիայի վարչապետ Ռեջեփ Թայիփ Էրդողանը հերքել է այդ երկրի նախագահ Աբդուլլա Գյուլի հետ տարակարծություններ ունենալու մասին թուրքական մամուլում հայտնված լուրերը:
Ինչպես հաղորդում է «Արմենպրես»-ը` վկայակոչելով թուրքական «Զաման» թերթը, այս մասին նա լրագրողներին ասել է Գերմանիա կատարած այցից վերադարձի ժամանակ, որտեղ Էրդողանը մասնակցել էր Բեռլինում թուրքական դեսպանատան նոր շենքի բացման արարողությանը եւ հանդիպել Գերմանիայի կանցլեր Անգելա Մերկելի հետ: «Նախագահի եւ իմ միջեւ տեսակետների տարբերություն որեւէ հարցում գոյություն չունի: Մենք միշտ էլ միեւնույն կարծիքն են արտահայտում: Մեր միջեւ անգամ ամենափոքր անհամաձայնություն չկա», -ասել է նա:
Թուրքական ԶԼՄ-ները երեկ հայտնել էին, որ Թուրքիայի հանրապետության օրվա տոնակատարության վերաբերյալ թուրքական կառավարության հրահանգն այն մասին, որ պաշտոնական արարողություններն Անկարայում թույլատրվում են միայն նախատեսված վայրերում, դարձել է Գյուլի եւ Էրդողանի միջեւ մի նոր պառակտման պատճառ: Թուրքական մամուլը նշել էր, որ Գյուլը Անկարայի նահանգապետ Ալլադդին Յուքսելին հանձնարարել է «լարվածություն չստեղծել» եւ հանել բարիկադները` ընդդիմադիր Ժողովրդահանրապետական կուսակցության գլխավորությամբ 40 ոչ կառավարական կազմակերպությունների անդամների` Անկարայի Ուլուս հրապարակում կազմակերպած «այլընտրանքային տոնակատարության» հանդեպ: Դրա հետ կապված Էրդողանը հայտարարել էր, թե «Երկգլխանի կառավարում Թուրքիայում չի կարող լինել»: Այդ առնչությամբ թուրքական ԶԼՄ-ները հայտնել էին. «Գյուլ-Էրդողան պառակտումը նոր չէ: Գյուլը վաղուց է քննադատում կառավարության մոտեցումները մարդու իրավունքների, ժողովրդավարացման գործընթացների եւ մի շարք հարցերում: Գյուլը նաեւ դժգոհ է Էրդողանի կառավարությունից այն բանի համար, որ նախագահի պաշտոնավարման ժամկետը 7 տարուց դարձվել է 5 տարի»: