2 րոպեի ընթերցում
ԵՐԵՎԱՆ, 22 ՀՈԿՏԵՄԲԵՐԻ, ԱՐՄԵՆՊՐԵՍ: «St. Lawrence University»-ի Մերձավոր Արեւելքի գծով պատմաբան եւ հետազոտող Հովարդ Էյզենսթեթը «The Washington Post»-ին ուղղված նամակում Ադրբեջանի իշխանությանը գող է անվանել: Նամակում նա գրել է, որ հիացած է թերթի հոկտեմբերի 15-ի համարում հրապարակված` «Ադրբեջանը հաճույք է ստանում հակաիրանական դերակատարությունից» վերտառությամբ հոդվածով, որտեղ իրեն զարմացրել եւ անգամ անհանգստացրել է այն, որ իսլամական երկրների համար Ադրբեջանը ներկայացվել է որպես «անհաջող երկրի մոդել»:
«Արմենպրես»-ի փոխանցմամբ` ամերիկացի գիտնականն անդրադարձել է միջազգային կազմակերպությունների զեկույցներում Ադրբեջանի ամենակոշտ ձեւով քննդատությանը եւ այդ երկրում մարդու իրավունքների եւ խոսքի ազատության կոպիտ սահմանափակումներին: Հեղինակը, հղում կատարելով «Freedom House» եւ «Transperency International» միջազգային կազմակերպություններին, նամակում նշել է, որ Ադրբեջանում խախտվում է օրենքի գերակայությունը, իսկ կոռուպցիան վերածվել է պետական քաղաքականության:
««Freedom House»-ը Ադրբեջանը ցուցադրել է խոսքի ազատությունը սարսափելի վիճակում գտնվող աշխարհի 18 երկրների շարքում: Կազմակերպության զեկույցներում Ադրբեջանը նշվում է ընդդիմադիր ակտիվիստների դեմ կոշտ ռեպրեսիաներով առաջին 10 երկրների մեջ: Լրագրողները, երիտասարդները եւ քաղաքական ակտիվիստները նետվում են բանտեր: «Transperenty International»-ը հայտնում է, որ Ադրբեջանն աշխարհի ամենակոռումպացված` գող ռեժիմներից մեկն է: Միջազգային հեղինակավոր կազմակերպությունները հեղինակավոր երգչուհիներ Ջենիֆեր Լոպեսին, Ռիհաննային եւ Շակիրային հորդորել են համերգներով հանդես չգալ մարդու իրավունքները կոպտորեն ոտնահարող Ադրբեջանում: Հնարավոր է` Իրանի կրոնական իշխանությունը սարսափած է Ադրբեջանի մշակույթով: Սակայն, մենք պետք է սարսափենք Ադրբեջանի` սեփական քաղաքացիների նկատմամբ նման անմարդկային վերաբերմունքից»,- «Washington Post»-ում գրում է Հովարդ Էյզենսթեթը: