2 րոպեի ընթերցում
ԵՐԵՎԱՆ, 1 ՀՈԿՏԵՄԲԵՐԻ, ԱՐՄԵՆՊՐԵՍ: Իտալիայի հավաքականի և Թուրինի «Յուվենթուս»-ի պաշտպան Ջորջիո Կյելինին կարծում է, որ Հայաստանի ընտրանու և «Շախտյոր»-ի կիսապաշտպան Հենրիխ Մխիթարյանը կարող է խաղալ Եվրոպայի լավագույն ակումբներում:
Ինչպես հաղորդում է«Արմենպրես»-ը` վկայակոչելով դոնեցկյան ակումբի պաշտոնական կայքը, Չեմպիոնների լիգայի խմբային փուլի երկրորդ տուրի Դոնեցկի «Շախտյորի» դեմ խաղից առաջ կայացած ասուլիսի ժամանակ պատասխանելով Մխիթարյանի մասին հարցին` Կյելինին նշել է. «Նա շատ ուժեղ ֆուտբոլիստ է: Մխիթարյանը տաղանդավոր է և կարող է խաղալ Եվրոպայի լավագույն ակումբներում: Մենք նրանից այդպիսի աճ չէինք սպասում, որովհետև նա նախկինում այդքան էլ լավ չէր խաղում: Բայց «Շախտյորում» շատ ֆուտբոլիստներ կան, ովքեր կարող են հանդես գալ աշխարհի առաջատար ակումբերում»,- ասել է Կյելլինին:
«Յուվենթուս»-«Շախտյոր» հանդիպումը տեղի է ունենալու հոկտեմբերի 2-ին Թուրինում: Չեմպիոնների լիգայի առաջին տուրից հետո Մխիթարյանի թիմը երեք միավորով գլխավորում է իր խմբի մրցաշարային աղյուսակը: «Շախտյոր»-ը սեփական հարկի տակ հենց Մխիթարյանի դուբլի շնորհիվ առավելության էր հասել դանիական «Նորդշենադ»-ի նկատմամբ: