Քաղաքաշինության նախարարությունում ստեղծվել է հանձնաժողով աղետի գոտու բնակարանները հանձնելուց առաջ ուսումնասիրելու համար

ԵՐԵՎԱՆ, 26 ՍԵՊՏԵՄԲԵՐԻ, ԱՐՄԵՆՊՐԵՍ:ՀՀ քաղաքաշինության նախարար Սամվել Թադևոսյանի սեպտեմբերի 25-ի հրամանով, ստեղծվել է հանձնաժողով աղետի գոտու 1756 բնակարանների հանձնումից առաջ: Ինչպես«Արմենպրես»-ին տեղեկացրին ՀՀ քաղաքաշինության նախարարությունից, հանձնաժողովը ստեղծվել է սղետի գոտու բնակավայրերում պետական աջակցությամբ իրականացվող բնակարանային շինարարության ծրագրի շրջանակներում ՀՀ Շիրակի մարզի Գյումրի քաղաքի «Մուշ 2-2» և «Անի» թաղամասերում «Գլենդել Հիլզ» ՓԲԸ-ի կողմից կառուցված և առաջիկայում շահագործման հանձնվող 38 շենքերի արտաքին բարեկարգման և թվով 1756 բնակարանների ներքին հարդարման աշխատանքների որակի համապատասխանությունը ուսումնասիրելու նպատակով: Հանձնաժողովը կղեկավարի քաղաքաշինական ԾԻԳ-ի տնօրենի տեղակալ Վահան Սարգսյանը, կազմում են ՀՀ քաղաքաշինության նախարարության քաղաքաշինական ԾԻԳ-ի և Քաղաքաշինական պետական տեսչության մասնագետներ, ինչպես նաև «Շիրակ կենտրոն» ՀԿ նախագահը:

Աշխատանքները իրականացվելու են կառուցապատողի` «Գլենդել Հիլզ» ՓԲԸ-ի ներկայացուցիչների մասնակցությամբ, ովքեր անհրաժեշտության դեպքում եռօրյա ժամկետում միջոցներ կձեռնարկեն թերություններն ու բացթողումները վերացնելու համար: Հանձնաժողովին հանձնարարված է մինչև սեպտեմբերի 29-ը ՀՀ քաղաքաշինության նախարարին ներկայացնել տեղեկանք` իրականացված ուսումնասիրության արդյունքների և ձեռնարկված միջոցառումների մասին :

ՀՀ քաղաքաշինության նախարար Սամվել Թադևոսյանն այցելել էր Գյումրու «Մուշ 2-2» և «Անի» թաղամասեր` շահագործման հանձնելուց առաջ շինարարության ավարտական աշխատանքներին ծանոթանալու նպատակով: