«Զենիթ»-ն ուրախ կլինի Սարգիս Հովսեփյանին դարձյալ տեսնել «Պետրովսկի» մարզադաշտում»

ԵՐԵՎԱՆ, 20 ՍԵՊՏԵՄԲԵՐԻ, ԱՐՄԵՆՊՐԵՍ: Սանկտ Պետերբուրգի «Զենիթ» ֆուտբոլային ակումբը շնորհակալություն է հայտնել Հայաստանի հավաքականի եւ պետերբուրգյան ակումբի նախկին ֆուտբոլիստ Սարգիս Հովսեփյանին ակումբում և պետերբուրգյան ֆուտբոլում ունեցած նշանակալի ներդրման համար եւ նշել, որ «ուրախ կլինի դարձյալ տեսնել ֆուտբոլիստին «Պետրովսկի» մարզադաշտում»:

Ինչպես հաղորդում է «Արմենպրես»-ը` շնորհակալական ուղերձը տեղադրված է «Զենիթ»-ի պաշտոնական կայքում:

Սարգիս Հովսեփյանը «Զենիթ»-ի կազմում հանդես է եկել 1998-2003 թվականներին։ Պետերբուրգյան թիմի կազմում նա նվաճել է Ռուսաստանի գավաթը, Լիգայի գավաթը, Ռուսաստանի առաջնության բրոնզե մեդալը, նաեւ խաղացել է Ինտերտոտոյի գավաթի խաղարկության եզրափակիչում։ Հովսեփյանը «Զենիթ»-ի կազմում անցկացրել է 164 հանդիպում եւ դարձել է երկու գոլի հեղինակ։

Սեպտեմբերի 20-ին Սարգիս Հովսեփյանը հայտարարեց ֆուտբոլիստի կարիերան ավարտելու մասին։