Լևոն Արոնյանն Ուկրաինայի հետ մրցավեճում հաղթանակ պարգևեց Հայաստանի հավաքականին

ԵՐԵՎԱՆ, 1 ՍԵՊՏԵՄԲԵՐԻ, ԱՐՄԵՆՊՐԵՍ: Թուրքիայի Ստամբուլ քաղաքում ընթացող շախմատի 40-րդ Օլիմպիադայում Հայաստանի հավաքականը տարավ իր չորրորդ անընդմեջ հաղթանակը` այս անգամ Ուկրաինայի նկատմամբ 2,5-1,5 հաշվով: Ինչպես հաղորդում է «Արմենպրես»-ը` 1-ին խաղատախտակի վրա հավաքականի առաջատար Լևոն Արոնյանը սպիտակ խաղաքարերով առավելության հասավ ուկրաինացի փորձառու գրոսմայստեր Վասիլի Իվանչուկի նկատմամբ: Մյուս խաղատախտակների վրա Սերգեյ Մովսիսյանը ոչ ոքի ավարտեց պարտիան Ռուսլան Պոնոմարյովի, Գաբրիել Սարգսյանը` Պավել Էլյանովի, Վլադիմիր Հակոբյանը` Անդրեյ Վոլոկիտինի հետ մրցամարտում:

Այսպիսով Հայաստանի տղամարդկանց հավաքականն Ստամբուլում շարունակում է իր հաղթական ընթացքը:

Համաշխարհային օլիմպիադայի կանանց մրցաշարում Հայաստանի հավաքականը ևս 2.5։1.5 հաշվով հաղթեց Անգլիայի թիմին։ Հաղթանակներով ավարտեցին իրենց հանդիպումներն Էլինա Դանիելյանն ու Լիլիթ Մկրտչյանը։ Մարիա Կուրսովան ոչ ոքի ավարտեց իր պարտիան, իսկ Աննա Հայրապետյանը պարտություն կրեց։