1 րոպեի ընթերցում
ԵՐԵՎԱՆ, 28 ՕԳՈՍՏՈՍԻ, ԱՐՄԵՆՊՐԵՍ: Արևելյան գործընկերության 2012թ-ի տարեկան գործողությունների ծրագրի շրջանակներում Եվրոպական հանձնաժողովը հաստատել է Հայաստանում դատաիրավական բարեփոխումներին ուղղված ֆինանսական աջակցության չափը: Ինչպես «Արմենպրես»-ին տեղեկացրին Եվրոպական Հանձնաժողովի մամուլի կենտրոնից, օժանդակությունը կտրամադրվի երկկողմ համագործակցության պլատֆորմի, ԵՄ-ի հետ քաղաքական ասոցացման և տնտեսական ինտեգրման շրջանակներում: Ընդհանուր առմամբ դատաիրավական բարեփոխումների այս տարվա ծրագրի համար ԵՄ-ն Հայաստանին կտրամադրի 60 մլն եվրո:
Օժանդակությունը կներառի ոլորտին առնչվող տեղական կառույցների աշխատակիցների վերապատրաստում, դատավորների, իրավաբանների և դատախազների համար վերապատրաստման կենտրոնների ստեղծում: Օժանդակության հիմնական նպատակն է անկախ, թափանցիկ և արդյունավետ դատական համակարգի ստեղծումը, որը կծառայի հայ ժողովրդին:
Ֆինանսավորում կուղղվի նաև այն կառույցներին, որոնք պատասխանատու են բանակցությունների փուլում գտնվող ԵՄ-Հայաստան պայմանագրերի, մասնավորապես, Ասոցացման համաձայնագրի, Խորը և համապարփակ ազատ առևտրի համաձայնագրի և Վիզային ռեժիմի դյուրացման և ռեադմիսսիայի պայմանագրերի իրականացման համար: