Հրապարակի շատրվանները «երգեցին» հատուկ սիրիահայ երեխաների համար

ԵՐԵՎԱՆ, 25 ՕԳՈՍՏՈՍԻ, ԱՐՄԵՆՊՐԵՍ: Հալեպից Հայաստան ժամանած 150 սիրիահայ երեխաներն օգոստոսի 25-ին ծանոթացան մայրաքաղաքի տեսարժան վայրերին: Ամառային հանգիստը Հանքավանի «Լուսաբաց» ճամբարում անցկացնող երեխաների համար այսօր առավոտյան հատուկմիացվել էին Հանրապետության հրապարակի երգող շատրվանները:Ինչպես «Արմենպրես»-ի հետ զրույցում նշեց ճամբարի տնօրեն Աշոտ Ավետիսյանը, սիրիահայ երեխաներնուղեվարի ուղեկցությամբ եղել են նաեւ Հայաստանի ազգային պատկերասրահում, Երեւանի կենդանաբանական այգում եւ շրջել են մայրաքաղաքի փողոցներով:

Կենդանաբանական այգում երեխաներին հատկապես գրավել են խոշոր կենդանիները: Սիրիահայ երեխաներին շատ է դուր եկել նաեւ Ազգային պատկերասրահը:«Հիմա արդեն բավական բարձր տրամադրությամբ ուղեւորվում ենք ճամբար: Օգոստոսի 29-ին երեխաները կայցելեն Գառնի-Գեղարդ, իսկ 30-ին կլինեն Ծիծեռնակաբերդում եւ Էջմիածնում»,-ասաց Ավետիսյանը:

Ամառային հանգիստը Հայաստանում անցկացնելու նպատակով2012 թ. օգոստոսի 9-ին Երևան ժամանեց սիրիահայ երեխաների առաջին` 120 հոգանոց խումբը։ Սիրիահայ երեխաների երկրորդ խումբը` թվով 149 երեխա, Երեւան ժամանեց օգոստոսի 14-ին: Եւս մեկ խումբ Հայաստան ժամանեց օգոստոսի 21-ին` երկու ինքնաթիռով` մեկը 50, մյուսը` 110 տեղանոց:Դամասկոսի և Հալեպի հայ երեխաների` Հայաստան տեղափոխման և հանգստի կազմակերպման ծախսերը հոգում է ՀՀ կառավարությունը: