1 րոպեի ընթերցում
ԵՐԵՎԱՆ, 16 ՕԳՈՍՏՈՍ, ԱՐՄԵՆՊՐԵՍ: Հայաստան- Բելառուս խաղը ամենավատ հանդիպումն էր, որ Հայաստանի ընտրանին անցկացրել էր վերջին շրջանում: «Արմենպրես»-ի փոխանցմամբ` Հայաստան-Բելառուս ընկերական հանդիպումից հետո կայացած ասուլիսի ժամանակ նման կարծիք հայտնեց Հայաստանի ազգային հավաքականի գլխավոր մարզիչ Վարդան Մինասյանը:
«Եթե խաղալու մեծ ցանկություն չկա, խաղը պետք է վատ ավարտվի: Մեր ցուցադրած խաղը վատագույններից էր, մենք արժանի էինք նման հաշվի»,-ասաց Մինասյանը:
Խոսելով պաշտպանության մասին` հավաքականի գլխավոր մարզիչը շեշտեց, որ այս ոլորտում բավականին մեծ խնդիրներ կան և անհրաժեշտ է գտնել դրանց լուծումները:
Օգոստոսի 15-ին «Հանրապետական» մարզադաշտում կայացած խաղում Բելառուսի ընտրանին Հայաստանի հավաքականի նկատմամբ հաղթանակ տարավ 2-1 հաշվով:
Հայաստանի ազգային հավաքականը հաջորդ խաղը կանցկացնի արդեն աշխարհի առաջնության ընտրական բուլի շրջանակներում: Սեպտեմբերի 7-ին մեր ընտրանին արտագնա խաղում ուժերը կչափի Մալթայի հետ: