1 րոպեի ընթերցում
ԵՐԵՎԱՆ, 15 ՕԳՈՍՏՈՍԻ, ԱՐՄԵՆՊՐԵՍ: Ռուսական Sports.ru պորտալը, պատմելով այն ֆուտբոլիստների մասին, ովքեր չեն ցանկանում համակերպվել «իրենց ժամանակն անցել է» մտքի հետ, առանձնացրել է նաեւ Հայաստանի ազգային հավաքականի և Երևանի «Փյունիկ»-ի ավագ Սարգիս Հովսեփյանին:
Հեղինականավոր կայքը մեր 39-ամյա ֆուտբոլիստի մասին, մասնավորապես, գրել է.«Սարգիս Հովսեփյանը, ով խաղացել է դեռևս ԽՍՀՄ առաջնությունում, հայկական ֆուտբոլի կենդանի լեգենդն է: Ռուս երկրպագուին խիզախ պաշտպանը ծանոթ է առաջին հերթին Սանկտ-Պետերբուրգի «Զենիթ»-ից: Վերջին ութ տարիները Հովսեփյանը խաղում է Երևանի «Փյունիկ»-ում, իսկ 2010-ին նրա թիմը «հեթ-տրիկ» ձևակերպեց՝ հաղթելով առաջնությունում, սուպերգավաթի և գավաթի խաղարկություններում: Սարգիսը մինչ այժմ խաղում է Հայաստանի հավաքականում` ավելորդ անգամ ապացուցելով, որ լեռնային օդն իրոք երկարացնում է առնվազն սպորտային կյանքը»,- «Արմենպրես»-ի հաղորդմամբ՝ գրված է ռուսական պորտալում: