Արտակ Ալեքսանյանը վերադարձել է «Խիմկի»

ԵՐԵՎԱՆ, 21 ՀՈՒԼԻՍԻ, ԱՐՄԵՆՊՐԵՍ: Ֆուտբոլի Հայաստանի երիտասարդական հավաքականի կիսապաշտպան Արտակ Ալեքսանյանը վերադարձել է մերձմոսկովյան «Խիմկի», որտեղից հեռացել էր նախորդ ամիս: Ինչպես հաղորդում է «Արմենպրես»-ը` վկայակոչելով մերձմոսկովյան ակումբի պաշտոնական կայքը, կողմերի միջև կնքվել է մեկ տարվա պայմանագիր:

Ալեքսանյանը մերձմոսկովյան թիմում ելույթ է ունենում 2011թ.-ի օգոստոսից, և գրեթե մեկ տարվա ընթացքում Ռուսաստանի առաջին դիվիզիոնում մասնակցել էր 18 հանդիպման, որոնցում դարձել էր երեք գոլի հեղինակ: «Խիմկի»-ում էին հանդես գալիս նաև ՀՀ ազգային ընտրանու կիսապաշտպան Արթուր Եդիգարյանը և ՀՀ մինչև 19 տարեկանների ընտրանու պաշտպան Էդուարդ Թաթոյանը: Երկու ֆուտբոլիստներն էլ այժմ մարզվում են Երևանի «Փյունիկ»-ում: