2 րոպեի ընթերցում
ԵՐԵՎԱՆ, 14 ՀՈՒԼԻՍԻ, ԱՐՄԵՆՊՐԵՍ: «Ոսկե ծիրան» երեւանյան միջազգային կինոփառատոնին մասնակցության համար արդեն երկրորդ անգամ Հայաստան է ժամանել Սերգեյ Լոզնիցան: Ընդամենը երկու լիամետրաժ խաղարկային ֆիլմերի հեղինակը արդեն բարձր համբավ ունի աշխարհում: Ոմանք կտարականպես դեմ են այն իրականությանը, որը Լոզնիցան պատկերում է իր ֆիլմերում, ուրիշները, ընդհակառակը, համեմատում են նրա ֆիլմերն անցած տարիների գլուխգործոցների հետ: Ամեն դեպքում այդ ժապավենները լայն քննարկման առարկա են դառնում եւ բացում հանդիսատեսի առաջ մութ եւ գուցե սարսափելի ռեալությունը, որը կա եւ միշտ եղել է: «Արմենպրես»-ի փոխանցմամբ` «Ոսկե ծիրան»-ին այս անգամ մասնակցության համար Լոզնիցան ներկայանում է իր «Մշուշում» ֆիլմով: Ռեժիսորը լրագրողների հետ հանդիպման ժամանակ նշեց, որ ֆիլմի սցենարն արդեն պատրաստ է եղել տասնմեկ տարի առաջ, սակայն չի կարողացել նկարահանել: «Ուղղակի չստացվեց, չեմ էլ հասնակում, թե ինչու»,- կատակեց նա: Լոզնիցան նշեց, որ արվեստը կյանքի սոսկ պատճենահանումը չէ, այլ` կյանքի մոդելը: «Արվեստի նյութ կարող է դառնալ այն ամենը, ինչ կարող է դառնալ կյանք: Արվեստը կանխատեսում է ապագան»,- ասաց նա: : «Մշուշում» կինոնկարը նկարահանված է բելառուս գրող Վասիլի Բիկովի համանուն պատմվածքի հիման վրա: ԽՍՀՄ-ի արեւմտյան սահմանները, 1942 թ.-ին: Շրջանն օկուպացված է գերմանացիների կողմից, եւ տեղի պարտիզանները կատաղի դիմադրություն են ծավալել: «Հին անտառում, որտեղ ոչ բարեկամ կա, ոչ թշնամի, եւ որտեղ անհետանում է դավաճանության ու հերոսության սահմանագիծը, երկաթգծի աշխատող Սուշենյան, որը հանիրավի մեղադրվել է դավաճանության համար եւ վրեժի թիրախ դարձել, ստիպված է բարոյական ընտրություն կատարել անբարո պայմաններում»,- պատմեց ֆիլմի մասին ռեժիսորը:
Ֆիլմն արժանացել է Կաննի FIPRESCI մրցանակի: Այն Գերմանիա-Ռուսաստան-Լատվիա-Հոլանդիա-Բելառուս համատեղ արտադրություն է: