1 րոպեի ընթերցում
ԵՐԵՎԱՆ, 23 ՀՈՒՆԻՍԻ, ԱՐՄԵՆՊՐԵՍ: Եվրոպայի խորհրդի խորհրդարանական վեհաժողովը կոչ է անում Թուրքիային վերանայել քրեական օրենսդրությունը: Ինչպես «Արմենպրես»-ին տեղեկացրին ԵԽԽՎ մամլո ծառայությունից, Թուրքիայի հարցերով վեհաժողովի զեկուցող ֆրանսիացի Ժոզեթ Դուրիոն ընդգծել է, որ անհրաժեշտ է մասնավորապես վերանայել հակաահաբեկչական և խոսքի ազատություններին վերաբերող օրենսդրությունը:
Նա ընդգծել է, որ մի ժամանակահատվածում, երբ Թուրքիան ցանկանում է շրջել ռազմական հեղաշրջումներով ողողված պատմության էջը, բազմաթիվ լրագրողներ, գիտնականներ, գեներալներ և ուսանողներ իրենց արտահայտած գաղափարների համար գտնվում են բանտերում:
«Արդարադատության նախարարությունը պետք է շարունակի աշխատանքը մոտարկել իր օրենսդրությունը Մարդու իրավունքների եվրոպական կոնվենցիայի հետ»,- ընդգծել է Դուրիոն:
ԵԽԽՎ զեկուցողը միաժամանակ շեշտել է, որ խոսքի և արտահայտման ազատությունը հիմնարար արժեքներ են և պետք է ներառվեն Թուրքիայի նոր Սահմանադրության մեջ: