Թուրք հոդվածագիրը կոչ է արել թուրքերին ընդօրինակել հայկական սփյուռքի արդյունավետ գործունեությունը
2 րոպեի ընթերցում
ԵՐԵՎԱՆ, 19 ՀՈՒՆԻՍԻ, ԱՐՄԵՆՊՐԵՍ: Թուրք հոդվածագիր Մուրադ Բարդաքչըն անդրադարձել է Հայոց ցեղասպանության ճանաչման դեմ թուրքական պետության պայքարին: Ինչպես հաղորդում է «Արմենպրես»-ը` վկայակոչելով թուրքական Haber Turk-ը, թուրք հոդվածագիրը նշել է, որ մինչ օրս Թուրքիան չի կարողանում ճիշտ և համակարգված պայքար մղել արտասահմանում ակտիվ գործունեություն ծավալող հայկական սփյուռքի դեմ:
Բարդաքչըն հայտնել է, որ ներկայում Թուրքիայում գոյություն ունեն տարատեսակ կազմակերպություններ, որոնք սակայն մի մեծ թերություն ունեն. չեն կարողանում ճիշտ հակադարձել աշխարհի չորս ծայրերում գործող հայկական սփյուռքին, և իրենց ջանքերն ուղղում են միայն Թուրքիայի ներսում գտնվող հայերին դեմ:
Խոսելով Թուրքիայի` արդեն ավանդական դարձած ստի քարոզչության մասին` թուրք հոդվածագիրը խորհուրդ է տվել հայերի դեմ պայքարել մեկ, համակարգված կենտրոնից: Նա իր մտավախությունն է հայտնել, որ դեպքերի նման շարունակության պայամններում հայկական սփյուռքին կհաջողվի 2015 թվականին տարբեր երկրներին Հայոց ցեղապսանության իրողությունն ընդունել տալը, այդ թվում և` ԱՄՆ-ին:
«Եթե չկարողանանք ազատվել ներկայիս մտածելակերպից, ապա երեք տարի անց Թուրքիայի «գլուխն ավելի կցավի», քան հիմա»,- գրում է Բարդաքչըն: