1 րոպեի ընթերցում
ԵՐԵՎԱՆ, 15 ՓԵՏՐՎԱՐԻ, ԱՐՄԵՆՊՐԵՍ: «Սննդի ոլորտի կին հերոս» մրցույթը կամփոփվի մարտի 8-ին` կանանց միջազգային օրվան նվիրված: Ինչպես «Արմենպրես»-ի հետ զրույցում նշեց Հայաստանի երիտասարդ կանանց ասոցիացիայի նախագահ Լիլիթ Ասատրյանը, այն իրականցվում է տնտեսական ոլորտում կանանց մասնակցությունը խրախուսելու նպատակով:
Մրցույթին մասնակցելու համար դիմել է գյուղատնտեսության ու ֆերմային տնտեսության ոլորտներում գործունեություն ծավալող ու հաջողության հասած շուրջ հարյուր կին` Հայաստանի բոլոր մարզերից: «Մրցանակաբաշխությունը միջոց է` ճանաչելու սննդի արտադրության ոլորտում աշխատանքներ ծավալած կանանց` ներկայացնելով կին գյուղատնտեսներին ու ֆերմերների` դրական փոփոխությունների բերած գործունեությունը»,-նշեց Ասատրյանը:
Մրցանակաբաշխությանը յուրաքանչյուր մարզից մեկ կին կարժանանա «Գյուղամթերքների արտադրության ոլորտի կին հերոս» մրցանակին:
Նախատեսվում է այդ կանանց մասին ֆիլմի եւ գրքույկի շնորհանդես, ինչպես նաեւ գյուղմթերքների ցուցահանդես-վաճառք, որտեղ կներկայացվի կանանց կողմից պատրաստված էկոլոգիապես մաքուր սնունդ: