Հայաստանը և ՆԱՏՕ-ն ԼՂ հակամարտության կարգավորման հարցում համակարծիք են: ՏԵՍԱՆՅՈՒԹ
2 րոպեի ընթերցում
![Հայաստանը և ՆԱՏՕ-ն ԼՂ հակամարտության կարգավորման հարցում համակարծիք են: ՏԵՍԱՆՅՈՒԹ](http://armenpress.am/resized/480/static/news/b/2012/03/682865.jpg)
ԵՐԵՎԱՆ, 6 ՄԱՐՏԻ, ԱՐՄԵՆՊՐԵՍ: ՀՀ Նախագահ Սերժ Սարգսյանը Բրյուսել կատարած աշխատանքային այցի ընթացքում հանդիպում է ունեցել ՆԱՏՕ-ի գլխավոր քարտուղար Անդերս Ֆոգ Ռասմուսենի հետ, որի ընթացքում քննարկվել է Լեռնային ղարաբաղի հակամարտության խաղաղ կարգավորման գործընթացը: Ինչպես փոխանցում է «Արմենպրես»-ը, համատեղ ճեպազրույցի ընթացքում ՀՀ Նախագահը շեշտել է, որ Ադրբեջանը կտրականապես մերժում է վստահության կառուցման ցանկացած առաջարկ` ուղղված լինի դա թե' տարածաշրջանային համագործակցության խթանմանը, թե' շփման գծում լարվածության թուլացմանը:
«Ադրբեջանը դեմ է, ցավոք սրտի, դիպուկահարների հետքաշմանն առաջին գծից, դեմ է միջադեպերի հետաքննությանը: Ոչ մի րոպե չեն դադարել պատերազմի կոչերը: Ադրբեջանի ղեկավարությունը շարունակում է հայերի նկատմամբ ատելության սերմանումը»,- ասել է Սերժ Սարգսյանը:
ՀՀ Նախագահը հիշեցրել է Ադրբեջանի նախագահի` ընդամենը մի քանի օր առաջ արած այն հայտարարությունը, որ ադրբեջանցիների թիվ մեկ թշնամին աշխարհասփյուռ հայությունն է: «Այս հանգամանքը պետք է արժանանա միջազգային հանրության գնահատականին»,- նշել է նա:
Սերժ Սարգսյանը և Անդերս Ֆոգ Ռասմուսենը համակարծիք են, որ Լեռնային Ղարաբաղի հակամարտությունը պետք է կարգավորվի բացառապես խաղաղ միջոցներով, բանակցությունների միջոցով` ԵԱՀԿ Մինսկի խմբի շրջանակներում: «Համոզված ենք, որ Լեռնային Ղարաբաղի հակամարտության խաղաղ կարգավորումը հնարավոր է միայն ժողովուրդների ինքնորոշման իրավունքի հարգման, անվտանգության համակողմանի երաշխիքների ապահովման միջոցով:
Եզրափակելով ցանկանում եմ վերահաստատել Հայաստանի պատրաստակամությունը շարունակելու փոխշահավետ համագործակցությունը Հյուսիսատլանտյան դաշինքի հետ»,- շեշտել է ՀՀ Նախագահը: