Սերժ Սարգսյանը ճիշտ է համարում բոլոր նրանց, ովքեր պահանջում են իրավական պետություն ոչ թե ապագայում, այլ այսօր և այստեղ
3 րոպեի ընթերցում
![Սերժ Սարգսյանը ճիշտ է համարում բոլոր նրանց, ովքեր պահանջում են իրավական պետություն ոչ թե ապագայում, այլ այսօր և այստեղ](http://armenpress.am/resized/480/static/news/b/2012/02/680463.jpg)
ԵՐԵՎԱՆ, 18 ՓԵՏՐՎԱՐԻ, ԱՐՄԵՆՊՐԵՍ: Հաղթանակով ոչ թե ավարտվեց, այլ նորովի սկսվեց մի ուրիշ գործ՝ ազատ ու արդար Հայաստանի կառուցումը: Ինչպես հաղորդում է «Արմենպրես»-ը, այս մասին Երկրապահ կամավորականների 9-րդ համագումարի ընթացքում ունեցած ելույթում նշեց ՀՀ Նախագահ Սերժ Սարսգյանը:
«Այսօր մեր երկրում տեղի են ունենում գործընթացներ, որոնք դրականորեն են փոխելու մեր երկրի դեմքը, նրան հաղորդելու են 21-րդ դարի քաղաքակրթությանը վայել նկարագիր: Սա ժամանակի հրամայականն է և Հայաստանն այլ ճանապարհ չունի: Սա մեծ ու դժվար գործ է, բայց մենք դա անելու ենք»,- նշեց ՀՀ Նախագահը:
Սերժ Սարգսյանի խոսքով՝ Հայաստանը մտնում է զարգացման նոր փուլ, «մենք կերտում ենք նոր երկիր, նոր հասարակություն ու նոր քաղաքացի»: «Կարգապահություն և ազատություն, կարգուկանոն և ժողովրդավարություն: Սրանք փոխադարձաբար լրացնում և պայմանավորում են միմյանց: Հայաստանի քաղաքացին լինելու է այնքան ազատ, որքան օրինապահ է»,- նշեց Նախագահը:
Սերժ Սարգսյանի ներկայացմամբ՝ «մեր հասարակության գրեթե բոլոր շերտերը պահանջում են ազատ ու արդար երկիր, պահանջում են իրավական պետություն ոչ թե ապագայում, այլ այսօր և այստեղ, և նրանք ճիշտ են»: «Մեզանում, ինչ խոսք, կան սեփական հնարավորությունները գերագնահատողներ, ովքեր ուղղակի շահարկում են դժվարությունները, կան նաև անհամբերներ ու կասկածամիտներ, ում հավատը սասանվել է, որովհետև բախվել են անարդարության ու ապօրինությունների հետ: Պետք է շարունակենք փոխել՝ հավատով»,- ասաց Նախագահը:
Սերժ Սարգսյանի խոսքով՝ բազմաթիվ բացասական երևույթներ, որ սովորական էին երեկ, այսօր արդեն բացառված են: Առանձին բացասական երևույթները խորացել են, նաև առաջացել են նորերը: «Փոփոխություններն առաջին հերթին դրանք բացառելու ուղղությամբ ենք տանելու: Մենք գնում ենք Հայաստանը համակողմանիորեն արդիականացնելու ճանապարհով»,- ասաց Սերժ Սարգսյանը:
Արդիականացումը, Նախագահի պարզաբանմամբ, վերաբերում է թե՛ մեր քաղաքական ու իրավական համակարգին, թե ՛ արդյունաբերությանը, թե՛ գիտությանն ու կրթությանը: «Մենք պետք է դառնանք ժամանակակից ազգ, որ մրցունակ է և պատրաստ է դիմակայել պատմական պահի մարտահրավերներին»,- նշեց Սարգսյանը: