ՀՀ Նախագահը վստահ է՝ ԵԿՄ-ում մարդիկ են, ում համար Հայաստանն ու Արցախը վեր են քաղաքականությունից
2 րոպեի ընթերցում
![ՀՀ Նախագահը վստահ է՝ ԵԿՄ-ում մարդիկ են, ում համար Հայաստանն ու Արցախը վեր են քաղաքականությունից](http://armenpress.am/resized/480/static/news/b/2012/02/680453.jpg)
ԵՐԵՎԱՆ, 18 ՓԵՏՐՎԱՐԻ, ԱՐՄԵՆՊՐԵՍ: Չլինելով քաղաքական կազմակերպություն՝ երկրապահը մեզանում ունեցել է և ունի հասարակական ու նույնիսկ քաղաքական կշիռ ու դեր: Ինչպես հաղորդում է «Արմենպրես»-ը, նման հայտարարությամբ Երկրապահ կամավորականների միության 9-րդ համագումարի ընթացքում հանդես եկավ ՀՀ Նախագահ Սերժ Սարգսյանը:
«Չթաքցնենք` երկրապահի նկատմամբ մեզանում եղել են նաև հակասական գնահատականներ»,- նշեց Նախագահը:
Նրա պարզաբանմամբ՝ պատերազմից վերադարձած մարդու համար բոլոր ժամանակներում եղել են լուրջ խնդիրներ՝ կապված խաղաղ պայմաններում հարմարվելու-չհարմարվելու և իր տեղը գտնելու հետ: «Այս խնդիրները և՛ հոգեբանական են, և՛ սոցիալական, և՛ հասարակական: Այսօր տարիների փորձն աչքի առաջ ունենալով կարող ենք փաստել, որ Ձեզ հաջողվել է լուծել այդ խնդիրը»,- շեշտեց Սերժ Սարգսյանը:
Նրա գնահատմամբ՝ ԵԿՄ-ի հասարակական ու քաղաքական վարկը մեզանում զգալի դրական ազդցություն է ունեցել և այսօր էլ ունի: «Նաև նրա քաղաքացիական կեցվածքով է պայմանավորվել մեր երկրի մթնոլորտը: Ի դեմս երկրապահի՝ այսօր մենք գործ ունենք պետության ու ժողովրդի ճակատագրով մտահոգ կազմակերպության հետ, որ զերծ է պատեհապաշտությունից և բոլոր առանցքային հարցերում ունեցել է և ունի հստակ ու կայուն դիրքորոշում: Այս դահլիճում նստած են մարդիկ, ում համար Հայաստանն ու Արցախը վեր են քաղաքականությունից և ամեն ինչից»,- ընդգծեց ՀՀ Նախագահը: