2 րոպեի ընթերցում
ԱՆԿԱՐԱ, 2 ՓԵՏՐՎԱՐԻ, ԱՐՄԵՆՊՐԵՍ: Թուրքիայի իշխող «Արդարություն եւ զարգացում» կուսակցության փոխնախագահ Հուսեին Չելիքը խստորեն քննադատել է Աթաթուրքին պաշտպանության տակ առնող եւ դպրոցներում պարտադիր երդվելու մասին օրենքները: Այս մասին, ինչպես հաղորդում է «Արմենպրես»-ը, հայտնում է HaberTurk հեռուստաալիքը:
«Ոչ մեկին օրենքով ստիպողաբար չենք կարող սիրել տալ Թուրքիայի Հանրապետության հիմնադիր Աթաթուրքին: Նրան օրենքով պաշտպանության տակ առնելը հուսալքող եւ տարօրինակ իրավիճակ է, որովհետեւ մարդիկ կարող են հիանալ նրա գործերով, կամ էլ քննադատել: Իսկ քննադատելն այդ օրենով պատժելի է», -ասել է Չելիքը` հեռուստաալիքի Kanal A ծրագրում` նշելով, որ անգամ Մուհամեդ մարգարեն պաշտպանված չէ օրենքով:
Չելիքն ասել է, որ անհրաժեշտ է վերացնել նաեւ թուրքական դպրոցներում ամեն օր երեխաներին երդում տալու արարողությունը: «Մեր դպրոցներում բազմաթիվ օտարերկրացիներ, ոչ էթնիկ թուրքերի երեխաներ են սովորում: Իսկ մենք ստիպում ենք, որ այդ երեխաներն ամեն օր երդվեն, որ թուրք են եւ ուրախ են, որ թուրք են: Սա անթույլատրելի իրավիճակ է», -ասել է նա:
ԱԶԿ գործիչն ասել է, որ մինչեւ եկող խորհրդարանական ընտրությունները, որին 3 տարի ժամանակ է մնացել, անհրաժեշտ է փոփոխություններ կատարել հիշյալ օրենքներում: