368.15
ԳԹԿ-ն կշարունակի աշխատել բաց եւ թափանցիկ
2 րոպեի ընթերցում
ԵՐԵՎԱՆ, 22 ԴԵԿՏԵՄԲԵՐԻ, ԱՐՄԵՆՊՐԵՍ: Գնահատման եւ թեստավորման կենտրոնի գործելաոճը հաջորդ տարում կշարունակի լինել բաց եւ թափանցիկ: Ինչպես հաղորդում է «Արմենպրես»-ը` այդ մասին այսօր լրագրողների հետ հանդիպնան ժամանակ ասաց ԳԹԿ տնօրեն Գուրգեն Խաչատրյանը: Ամփոփելով ընթացիկ տարին, նա նշեց, որ իրենք հաջողությամբ կարողացել են իրականացնել ընդունելության ավարտական եւ միասնական քննությունները, իններորդ դասարանի քննությունները եւ ընթացիկ մի շարք այլ աշխատանքներ: «Թեեւ դժվարությունները շատ էին, բայց կարողացանք դրանք հաղթահարել»,- նշեց նա: Գուրգեն Խաչատրյանը կարեւորեց նաեւ հանրակրթական դպրոցներում իրենց անցկացրած արտաքին գնահատումը: Միջազգային համագործակցության տեսակետից կարեւորվեց ընթացիկ տարվա ապրիլին բոլոր մարզերի հարյուր հիսուն դպրոցներում անցկացված «Թիմս» միջազգային ստուգատեսը, որն անցկացվում է չորս տարին մեկ: Խաչատրյանը գնահատելի համարեց նաեւ սերտ համագործակցությունը ռուսաստանյան «Սիսեդ» դպրոցի հետ, որի արդյունքում թեստային ստուգատեսի են մասնակցել Երեւանի` Պուշկինի անվան, ինչպես նաեւ Էջմիածնի ռուսական դպրոցների շուրջ քառասուն երեխաներ: «Այդ առաջադրանքներն օգնեցին մեզ ստուգել այդ երեխաների տրամաբանությունը, ինֆորմացիա ստանալու եւ մշակելու կարողությունը»,- ասաց նա` հավելելով, որ հաջորդ տարի ծրագրին կմիանան նաեւ մյուս բոլոր դպրոցները:
Բաժանորդագրվեք մեր ալիքին Telegram-ում