1 րոպեի ընթերցում
ԵՐԵՎԱՆ, 15 ՆՈՅԵՄԲԵՐԻ, ԱՐՄԵՆՊՐԵՍ: Քաղաքական զարգացումների արդյունքում Լեռնային Ղարաբաղի խնդրի կարգավորման գործընթացը կարող է դանդաղել: Ինչպես այսօր լրագրողների հետ հանդիպմանը կարծիք հայտնեց ԱԺ պատգամավոր Գագիկ Մելիքյանը, Ադրբեջանի' ՄԱԿ-ի Անվտանգության խորհրդի ժամանակավոր անդամ դառնալը լուրջ փոփոխությունների առիթ չի դառնա: «Ադրբեջանն իր համախոհ երկրների օժանդակությամբ կփորձի հիմնահարցը տեղափոխել ՄԱԿ-ի նիստերի օրակարգ, ինչը երբեւէ չի հաջողվի նրան, քանի որ ՄԱԿ-ի Անվտանգության խորհրդի անդամ հինգ երկրներից երեքը համանախագահող երկրներ են, որոնք հարցի լուծումը տեսնում են Մինսկի խմբի շրջանակներում»,- նշեց նա:
Մելիքյանի խոսքով' ոչ ոք չի պատրաստվում փոփոխել այդ ձեւաչափը, չնայած Ադրբեջանն իր քայլերով միշտ ուշադրություն է գրավում' ԼՂ խնդրի հետ կապված: «Միջազգային հանրությունը շատ ավելի լավ կճանաչի Ադրբեջանին ու լավ կիմանա Ղարաբաղի իրական պատմությունը, քանի որ ցանկացած ազդեցություն բերում է հակազդեցություն, ինչի արդյունքում արտաքին քաղաքականությամբ զբաղվող հայաստանյան քաղաքական ուժերը հնարավորություն կունենան ցույց տալ իրականությունը. Ադրբեջանն Արցախի հետ ոչ մի պատմական առնչություն չունի»,-կարծում է ՀՀԿ պատգամավորը: