Խոսրով Հարությունյան. «Եկեղեցուն հարկային արտոնություն տրամադրելով` պետությունը պետք է փոխհատուցի համայնքային բյուջեների բացը»
2 րոպեի ընթերցում
ԵՐԵՎԱՆ, 26 ՀՈԿՏԵՄԲԵՐԻ, ԱՐՄԵՆՊՐԵՍ: Հայ առաքելական եկեղեցուն հարկային արտոնություն տրամադրելով` պետությունը պետք է փոխհատուցի համայնքային բյուջեների բացը: «Արմենպրես»-ի հետ զրույցում, անդրադառնալով ԱԺ-ում քննարկվող` Հայ առաքելական եկեղեցուն պատկանող հողատարածքներից ու գույքից գանձվող հարկերի հետ կապված որոշակի հարկային արտոնություններ տալու վերաբերյալ հարցին, նման տեսակետ հայտնեց Հանրային խորհրդի անդամ Խոսրով Հարությունյանը:
«Հարցը ոչ թե եկեղեցուն նման արտոնություն տալու կամ չտալու մեջ է, այլ Ազգային ժողովը տեղական ինքնակառավարման մարմինների բյուջետային եկամուտները նվազեցնելու իրավունք չունի: ԱԺ-ն չի կարող օրենքով գույքահարկի ու հողահարկի արտոնություններ սահմանել ` չփոխհատուցելով այդ արտոնություններին համաչափ գումարներ` պետական բյուջեից համայնքային բյուջե»,- ասաց Հարությունյանը:
Հիշեցնենք, որ այս հարցի առնչությամբ իր մտահոգությունն էր հայտնել նաեւ ԱԺ նախագահ Հովիկ Աբրահամյանը` ընդգծելով, որ այդ օբյեկտների որոշ մասը գտնվում է համայնքային ենթակայության տակ, եւ հնարավոր է այս կերպ նվազեցվեն համայնքային բյուջեների մուտքերը:
Հիշեցնենք, որ Հայ առաքելական եկեղեցին ԱԺ-ին է ներկայացել 286 օբյեկտներից բաղկացած մի ցանկ, որոնք պետք է օգտվեն այդ արտոնություններից, սակայն ցանկն ամբողջական չէ եւ դեռեւս կարող է համալրվել: