Ա. Իսկանդարյան. «ԼՂ հիմնահարցի շուրջ միակ զարգացումը կարող է լինել Ադրբեջանի հռետորաբանության փոփոխությունը»
1 րոպեի ընթերցում
ԵՐԵՎԱՆ, 19 ՀՈԿՏԵՄԲԵՐԻ, ԱՐՄԵՆՊՐԵՍ: Ղարաբաղյան հիմնահարցի շուրջ միակ զարգացումը կարող է լինել Ադրբեջանի հռետորաբանության փոփոխությունը: Այսօր լրագրողների հետ հանդիպման ժամանակ նման կարծիք հայտնեց Կովկասի ինստիտուտի տնօրեն Ալեքսանդր Իսկանդարյանը' հավելելով, որ Ֆրանսիայի ակտիվությունը բանակցային գործընթացում ոչ մի էական փոփոխություն չի ենթադրում, միաժամանակ դա չի ենթադրում նաեւ Ռուսաստանի պասիվացում:
«Ղարաբաղյան հիմնահարցում կողմերն ունեն հստակ դիրքորոշումներ ու դրանց թվում հատկապես Հայաստանը, ով շարունակում է իր որդեգրած քաղաքականությամբ առաջ ընթանալ' առաջ քաշելով կոմպլեմենտարիզմը»,- ընդգծեց Ա. Իսկանդարյանը: Նրա խոսքով' ի հակադրություն դրա' Ադրբեջանը գործ ունի երկու կողմերի հետ' Հայաստանի ու Լեռնային Ղարաբաղի Հանրապետությունների, որոնցից յուրաքանչյուրը կարող է վճռորոշ քայլեր ակնկալել:»Հաշվի նստելով այդ գործոնի հետ' նրանք կարող են տարբեր միջազգային հարթակներում փորձել փոխել իրենց հռետորաբանությունը»,- նշեց նա' հավաստիացնելով, որ Ադրբեջանում հասկանում են երկու հանրապետությունների ինքնուրույնությունն այս հարցում: