2 րոպեի ընթերցում
ԵՐԵՎԱՆ, 17 ՀՈԿՏԵՄԲԵՐԻ, ԱՐՄԵՆՊՐԵՍ: 2011 թվականն առանձնահատուկ էր Հայաստանի եւ հայ-ֆրանսիական հարաբերությունների համար: Այսօր լրագրողների հետ հանդիպման ժամանակ նման տեսակետ հայտնեց ՀՀ-ում Ֆրանսիայի Հանրապետության արտակարգ եւ լիազոր դեսպան Անրի Ռենոն' հավելելով, որ Հայաստանը կարող է հպարտ լինել վերջին քսան տարվա ընթացքում երկրում իրականացրած ծրագրերով, քանի որ այս ընթացքում ձեռք է բերել ժողովրդավարական մշակույթ: «Բացի այդ, ՀՀ-ն միջազգային թատերաբեմում իր տեղն է զբաղեցրել, դարձել է Եվրոպայի խորհրդի անդամ եւ նշանակալի մերձեցման գնացել ԵՄ-ի հետ»,- շեշտեց դեսպանը:
Նրա խոսքով' մարտահրավերները շատ են եւ դժվար' սկսած արտաքինից մինչ տնտեսական, սակայն վերջին քսան տարվա նվաճումները խոստումնալից էին Հայաստանի համար:
Անդրադառնալով Ֆրանսիայի նախագահ Նիկոլա Սարկոզիի Հայաստան կատարած պետական այցին' Անրի Ռենոն նշեց,որ այդ այցը սպասված էր:
Դեսպանը կարեւորեց նաեւ Ն.Սարկոզիի' Հայոց ցեղասպանության ճանաչման վերաբերյալ հստակ ընդգծված ուղերձը: Ա.Ռենոն մեջբերեց նաեւ Ֆրանսիայի նախագահի խոսքը' կոչ անելով Թուրքիային առերեսվել իր պատմության հետ եւ ճանաչել Հայոց ցեղասպանությունը:
Ա.Ռենոն կարեւորեց նաեւ Ֆրանսիայի նախագահի' Լեռնային Ղարաբաղի հակամարտության կարգավորման լուծման վերաբերյալ ուղերձը: