Մ. Շահգելդյան. «Ս. Սարգսյանի ելույթում կարեւորագույն հարցը ԼՂ հիմնախնդրի նկատմամբ դիրքորոշումն էր»

ԵՐԵՎԱՆ, 29 ՍԵՊՏԵՄԲԵՐԻ, ԱՐՄԵՆՊՐԵՍ: ՄԱԿ-ի գլխավոր ասամբլեայի 66-րդ նստաշրջանում Սերժ Սարգսյանի ելույթում կարեւորագույն հարցը ԼՂ-ի հիմնախնդրի նկատմամբ դիրքորոշումն էր: Այսօր լրագրողների հետ հանդիպման ժամանակ նման տեսակետ հայտնեց «Օրինաց երկիր» կուսակցության փոխնախագահ Մհեր Շահգելդյանը: «Այդ դիրքորոշման մեջ հստակ ասվեց, որ ԼՂ-ի հիմնախնդրի լուծումը, ըստ էության, հենվում է 3 սկզբունքների' տարածքային ամբողջականության, ազգային ինքնորոշման եւ ուժի չկիրառման վրա»,-ասաց նա' հավելելով, որ այդ սկզբունքները պետք է դիտարկվեն հավասարակշռության մեջ:

Մ. Շահգելդյանի խոսքով' մյուս կարեւոր խնդիրը Ցեղասպանության հարցի վերաբերյալ մոտեցումներն էին: Նա ուշադրություն հրավիրեց երկրի նախագահի այն հայտարարության վրա, որ Հայաստանի Հանրապետության բարոյական պարտքն է ցեղասպանության կանխարգելումը եւ նման երեւույթների կրկնության դեմ պայքարը: «Սա կարեւոր է այն տեսանկյունից, որ ՀՀ մշտապես շեշտել էր, որ ցեղասպանության ճանաչումը ունի նաեւ կանխարգելող նպատակ, եւ մենք հայտ ենք ներկայացնում' համաշխարհային մակարդակով' մեզ վրա վերցնելով մի առաքելություն' բարոյական տեսանկյունից պայքարելու ցեղասպանության դեմ»,- նշեց նա: Մ. Շահգելդյանը կարծիք հայտնեց, որ Հայոց ցեղասպանության ընդունման գործընթացը անկասելի է. ճանաչումը պետք է տեղի ունենա, քանի որ սա բխում է համամարդկային իրավունքների պաշտպանությունից: Մյուս կողմից, ըստ նրա, Հայաստանը դառնում է գլոբալ քաղաքական գործընթացների առաջամարտիկներից մեկը' ցեղասպանությունների կանխարգելման տեսակետից: