1 րոպեի ընթերցում
ԵՐԵՎԱՆ, 29 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանում ներքաղաքական վիճակը կայուն է: Այսօր լրագրողների հետ հանդիպմանը նման տեսակետ հայտնեց ԱԺ ԲՀԿ խմբակցության պատգամավոր Վարդան Բոստանջյանը: «Այն լարվածությունը, որ կա, բնական է, քանի որ մոտենում են ընտրությունները»,-ասաց նա' հավելելով, որ քաղաքական ուժերը անում են ամեն բան' այդ լարվածությունը սրելու համար: Նրա խոսքով' ընտրությունների արդյունքում համամասնական ձայների բաժանումը տեղի կունենա հիմնական քաղաքական ուժերի միջեւ: ԲՀԿ անդամը նշեց, որ հարգում է ընդդիմությանը, բայց նրանց շարքերում մրցակից չի տեսնում:
Հայաստանում տիրող սոցիալ-տնտեսական վիճակը Վ.Բոստանջյանը գնահատեց դրական: «Օգտագործվում են բոլոր հնարավոր ռեզերվներն ու հնարավորությունները, այդ թվում' արտաքին ֆինանսական միջոցները, առկա խնդիրները լուծելու համար»,- ասաց նա: Որպես այս ամենի ապացույց' նա խոսեց անկախության տոնին նվիրված տոնակատարության, զորահանդեսի մասին, որը ցույց տվեց երկրի ուժը: Նրա բնորոշմամբ' Հայաստանը գտնվում է անխոցելի մակարդակի վրա: