1 րոպեի ընթերցում
ԵՐԵւԱՆ, 19 ՍԵՊՏԵՄԲԵՐԻ, ԱՐՄԵՆՊՐԵՍ: Այսօր մեր անկախությունը 20 տարեկան է, եւ այն պահելու կարեւոր հենքը ժողովրդավարական ամուր պետություն կառուցելն է: Այս մասին այսօր լրագրողների հետ հանդիպման ժամանակ ասաց ԱԺ «Բարգավաճ Հայաստան» խմբակցության անդամ Նաիրա Զոհրաբյանը' հավելելով, որ պետք է ունենանք կայացած ամուր քաղաքացիական հասարակություն: «Յուրաքանչյուրս մեր աշխատանքով պետք է մեր քարը դնենք անկախության պահպանման գործում: Անկախությունն այնպիսի արժեք է, որ սոցիալական ինչպիսի պայմաններում էլ լինի քաղաքացին, քվեարկելու է անկախության օգտին»,- ասաց նա:
Որպես նախկին լրագրող' Նաիրա Զոհրաբյանը կարեւորեց երկու ձեռքբերում' ազատ խոսքի կայացումը եւ քաղաքացիական հասարակության ձեւավորումը: ԲՀԿ խմբակցության պատգամավորը համոզմունք հայտնեց, որ 10 տարի անց Հայաստանը լինելու է եվրոպական ընտանիքի կարեւոր մաս եւ աշխատելու են ավելի արդար,բարգավաճ երկրում: