2 րոպեի ընթերցում
ԵՐԵՎԱՆ, 16 ՍԵՊՏԵՄԲԵՐԻ, ԱՐՄԵՆՊՐԵՍ: Երկխոսությունը կարեւոր է քաղաքական դաշտի կայացման համար: Այսօր Ազգային ժողովում կայացած ճեպազրույցների ընթացքում նման հայտարարությամբ հանդես եկավ ԱԺ ՀՀԿ խմբակցության ղեկավար Գալուստ Սահակյանը' ընդգծելով, որ իշխող կոալիցիան միշտ էլ պատրաստ է երկխոսելու:
Անդրադառնալով Հայ ազգային կոնգրեսի կողմից որպես երկխոսության ընդհատման պատճառ ՀԱԿ ակտիվիստ Տիգրան Առաքելյանի կալանավորումն առաջ քաշելու հարցին' Գ.Սահակյանը նշեց, որ տվյալ հարցի շուրջ քաղաքական լուծումներ չեն կարող լինել, քանի որ դա «այլ լիազոր մարմնի գործ է»: «Խնդրի լուծումը ոչ թե զգացմունքային կամ քաղաքական դաշտում է, այլ' իրավական»,- շեշտեց ՀՀԿ խմբակցության ղեկավարը:
ԱԺ փոխխոսնակ, ԲՀԿ խմբակցության ներկայացուցիչ Սամվել Բալասանյանի կանխատեսմամբ էլ' երկխոսությունն ունենալու է շարունակություն: Իսկ ինչ վերաբերում է Տ.Առաքելյանի գործին' Ս.Բալասանյանը նշեց, որ իրավապահները պետք է որոշեն, թե ով է տվյալ հարցում մեղավորը:
«Օրինաց երկիր» խմբակցության ղեկավար Հեղինե Բիշարյանի խոսքով' առկախված երկխոսությունը պետք է շարունակվի: «Մեկ անձի խնդիրը չպետք է երկխոսության առկախման պատճառ դառնա»,- ասաց նա: Իսկ անդրադառնալով ՀԱԿ առաջնորդ Լեւոն Տեր-Պետրոսյանի այն հայտարարությանը, որ եթե մինչեւ սեպտեմբերի վերջ չուծվի Տ.Առաքելյանի կալանավորման հարցը, ապա ընդդիմությունն այլ լեզվով կխոսի' Հ.Բիշարյանը շեշտեց, որ իրար հետ ժամկետներով խոսելը լավագույն տարբերակը չէ: