1 րոպեի ընթերցում
ԵՐԵՎԱՆ, 14 ՍԵՊՏԵՄԲԵՐԻ, ԱՐՄԵՆՊՐԵՍ: Հայ ազգային կոնգրեսի հետ երկխոսությունը սկսվեց Հայաստանի Հանրապետության նախագահի հավասարակշռված եւ զուսպ քաղաքականությամբ: Այս մասին այսօր լրագրողների հետ հանդիպման ժամանակ ասաց ԱԺ ՀՀԿ խմբակցության պատգամավոր Գագիկ Մելիքյանը' հավելելով,որ նույնպիսի պատասխան են սպասում ՀԱԿ-ի իրենց գործընկերներից: «Կարող եմ հավաստել, որ ՀԱԿ-ն ըմբռնումով կմոտենա մեր հորդորներին: Ես հավանական եմ համարում մոտ ապագայում երկխոսության վերսկսումը»,- կարծիք հայտնեց պատգամավորը:
Նրա խոսքով' նախագահը դեռ երեք տարի առաջ էր հրավիրում երկխոսության, սակայն ՀԱԿ-ը չէր արձագանքում: «ՀԱԿ-ն է առկախել երկխոսությունը, նա էլ պետք է սկսի: Ոչ մի պատեհ կամ անպատեհ առիթ չի կարող պատճառ դառնալ երկխոսության դադարեցմանը»,-նշեց Գ. Մելիքյանը: