2 րոպեի ընթերցում
ԵՐԵՎԱՆ, 1 ՍԵՊՏԵՄԲԵՐԻ, ԱՐՄԵՆՊՐԵՍ: Առաջիկայում կարող է ի հայտ գալ Լեռնային Ղարաբաղի խնդրի լուծման նոր փաթեթ, որում Ստեփանակերտ-Բաքու բանակցությունները կլինեն ամենակարեւորը: Այսօր լրագրողների հետ հանդիպման ժամանակ նման կանխատեսմամբ հանդես եկավ «Եվրոպական ինտեգրացիա» ՀԿ նախագահ, քաղաքագետ Կարեն Բեքարյանը' հավելելով, որ Ստեփանակերտ-Բաքու երկխոսությունը բանակցությունների տրամաբանական շարունակությունն է:
Անդրադառնալով Լեռնային Ղարաբաղի անկախության հռչակման 20-ամյակին' քաղաքագետը շեշտեց, որ ներկայում երկրորդ հայկական պետության զարգացման համար խիստ կարեւոր են մի քանի հանգամանքներ, որոնց թվում են բանակցային գործընթացը, ԼՂ պետականաշինությունը, միջազգային միջավայրը, ՀՀ-ԼՂՀ համագործակցությունը:
Վերլուծելով բանակցային գործընթացի նախորդ փուլերը' քաղաքագետը մասնավորապես կարեւորեց «Ընդհանուր պետության» փաթեթը' ընդգծելով, որ այն մերժելով եւ հայտարարելով, որ պատրաստ է լայն ինքնավարություն տրամադրել Լեռնային Ղարաբաղին, Ադրբեջանը ցույց տվեց իր ստախոսությունը:
Խոսելով պետականաշինության խնդիրների մասին' Կ.Բեքարյանը նշեց, որ այն շատ ավելի բարձր մակարդակի վրա է ԼՂՀ-ում, քան ՄԱԿ-ի կողմից ճանաչված շատ պետություններում:
«Միջազգային միջավայրի մեջ նույնպես կան փոփոխություններ»,- ասաց քաղաքագետը' ի նկատի ունենալով մի շարք պետությունների անկախացումը, ինչն ապացուցեց, որ աշխարհում ինքնորոշման իրավունքի ընկալման առումով կան փոփոխություններ: Ինչ վերաբերում է ՀՀ-ԼՂ փոխգործակցության հարցին, քաղաքագետը նշեց, որ այստեղ բավական հստակ է Հայաստանի դիրքորոշումը, որը նախագահի կողմից հայտարարվեց' Հայաստանը կճանաչի Լեռնային Ղարաբաղի Հանրապետությունը, եթե Ադրբեջանը պատերազմ սկսի: