2 րոպեի ընթերցում
ԵՐԵՎԱՆ, 20 ՕԳՈՍՏՈՍԻ, ԱՐՄԵՆՊՐԵՍ: Մեր օրերի ամենաարդիական մտահոգություններից մեկին' նիհարելուն ուղղված նորանոր արդյունավետ տարբերակներ են ի հայտ գալիս: Սակայն, արտասահմանյան, վերջերս նաեւ Հայաստանում կիրառվող փորձը ցույց է տալիս, որ նիհարելու համար միայն սահմանափակ քանակությամբ մթերքների օգտագործումը եւ կանոնակարգված սննդակարգը բավական չեն: Հոգեբանական ճիշտ տրամադրվածությունը, հայ մասնագետների հավաստմամբ, նիհարելու լավագույն երաշխիքներից է:
«Նիհարելու գլխավոր մասն է կազմում հոգեբանական ճիշտ մոտեցումը, այստեղ հենց մեծ նպատակին հասնելու մեծ ցանկությունն է վերջնական արդյունքի հանգեցնում»,- «Արմենպրես»-ի հետ զրույցում ասաց «Բորմենտալ» միջազգային կենտրոնի հայաստանյան մասնաճյուղի գլխավոր մասնագետ, հոգեբան Արմինե Փաշայանը:
Թեեւ հոգեբանական համալիր նիհարեցման հիմքում էլ կա սննդային որոշակի կանոնակարգ, սակայն այն չի սահմանափակվում ոչ մի մթերքով. գաղտնիքը տվյալ դեպքում կանոնավոր սնվելը եւ հոգաբանորեն ճիշտ պահվածքն է: Սննդակարգի պարտադիր բաղադրիչներից է միսը, որը պարունակում է մարդու օրգանիզմի համար անհրաժեշտ սպիտակուցներ:
«Եթե մարդը սնվի այն ժամանակ, երբ քաղցած է, ապա չի գիրանա. գիրանում է հատկապես այն դեպքում, երբ ուտում է նյարդայնացած, վիրավորված, զայրացած ժամանակ», - պարզաբանում է մասնագետը: Նրա հիշեցմամբ' անհրաժեշտ է սնվել, ինչպես ընդունված է' 4 ժամը մեկ, ընդ որում' քնելուց 1.5 ժամ առաջ պետք է լինի սննդի վերջին ընդունումը, եւ արթնանալուց 1.5 ժամվա ընթացքում ' առաջինը: