1 րոպեի ընթերցում
ԵՐԵՎԱՆ, 10 ՕԳՈՍՏՈՍԻ, ԱՐՄԵՆՊՐԵՍ: Քաղաքական կոալիցիայի եւ Հայ ազգային կոնգրեսի միջեւ երկխոսության կարեւորագույն կետերից մեկն այն է, որ քաղաքակիրթ տարբերակ է ձեւավորվում: Այս մասին այսօր լրագրողների հետ հանդիպման ժամանակ ասաց «Սոցիոմետր» անկախ սոցիոլոգիական կենտրոնի տնօրեն Ահարոն Ադիբեկյանը' հավելելով, որ նման ձեւաչափով երկխոսությամբ նոր մշակույթ է ձեւավորվում, որը շատ կարեւոր է երկրի համար:
«Առ այսօր իշխանությունը եւ ընդդիմությունը երկխոսության չէր գնացել, սա առաջին նախադեպն է մեր երկրում: Դա պետք է ամրագրել եւ շարունակել փոխզիջումների, փոխընդունելի ճանապարհներ, մեթոդներ գտնելու միջոցով»,-ասաց Ա. Ադիբեկյանը: Ըստ նրա' մեծամասնությունը որոշում կայացնելուց պարտավոր է փոքրամասնության կարծիքն արտահայտել իր որոշման մեջ:
Ա. Ադիբեկյանի կարծիքով' ճիշտ չէ, երբ ՀԱԿ-ը խոսում է ժողովրդի անունից: Ըստ նրա' ժողովրդի անունից կարող է խոսել միայն նախագահը: Սոցիոլոգը նկատեց, որ բոլոր ընդդիմադիրներին Հայ ազգային կոնգրեսական համարելու նկրտումները ճիշտ չեն, քանի որ քաղաքական դաշտում իրենց դերն ունեն թե «Ժառանգություն»-ը, թե ՀՅԴ-ն: