Ռ. Մելքոնյան. «Հսկայական թուրքական պետությունը հենվում է մի թերթի սխալ թարգմանած նյութի վրա»
2 րոպեի ընթերցում
ԵՐԵՎԱՆ, 8 ՕԳՈՍՏՈՍԻ, ԱՐՄԵՆՊՐԵՍ: Թուրքիայում շարունակվում է հակահայկական հիստերիան, հակահայկական տրամաբանությամբ քաղաքականությունը: Այս մասին «Արմենպրես»-ի հետ զրույցում նշեց թուրքագետ Ռուբեն Մելքոնյանը' մեկնաբանելով այն իրողությունը, որ «Հուրիեթ»-ը ընդունել է ՀՀ նախագահ Սերժ Սարգսյանի' Ծաղկաձորում հայագիտական օլիմպիադայի մասնակիցների հարցերի պատասխանը խեղաթյուրված ներկայացնելու դիտողությունը: Ռ. Մելքոնյանի խոսքով' ամեն փոքր առիթ կարող է պատճառ դառնալ, որ թուրք ամենաբարձրաստիճան պաշտոնյաները հանդես գան անտրամաբանական եւ խեղաթյուրված հայտարարություններով:
«Թուրքիայում մամուլի միջոցները, անկախ իրենց կողմնորոշումից, հաճախ սպասարկում են իշխանություններին եւ ծառայում են քաղաքական նպատակների: Դա հատկապես արվում է' կապված արտաքին քաղաքականության, մասնավորապես' Հայաստանի հետ»,-ասաց Ռ. Մելքոնյանը: Նա զավեշտ է համարում այն, որ Թուրքիայի արտաքին գործերի նախարարությունը, վարչապետը, այնուհետեւ' Ադրբեջանի նախագահը բոլոր իրենց վերլուծություններն արել են' հենվելով «Հուրիեթ»-ի սխալ թարգմանության վրա:
«Մենք ականատես ենք լինում մի բանի, որ հսկայական թուրքական պետությունն ու նրա ամբողջ պետական մեքենան հենվում է մի թերթի սխալ թարգմանած նյութի վրա»,- ավելացրեց Ռ. Մելքոնյանը:
Թուրքագետը հնարավոր տարբերակ համարեց նաեւ այն, որ գուցեեւ թուրքական իշխանությունները, իմանալով հանդերձ, որ թարգմանությունն այդքան էլ ճիշտ չէ, հենվել են դրա վրա, քանի որ իրենց պետք էր առիթ' աղմուկ բարձրացնելու համար: